Ermənistan və Azərbaycan bir-biri üçün qarşılıqlı şəkildə nəqliyyat xətlərini açmalıdır.
Bunu Ermənistan Baş naziri Nikol Paşinyan İrəvanda türkiyəli jurnalistlərlə söhbətində deyib.
“Məsələn, Ermənistanın şimal rayonlarından Mehriyə, yəni cənub bölgəsinə birbaşa dəmir yolu əlaqəsi yoxdur. Mövcud dəmir yolu xətti yalnız Azərbaycan ərazisindən, Naxçıvan Muxtar Respublikasından keçir.
Ona görə də deyirik ki, Azərbaycanla dəmir yolu əlaqəsini bərpa etməyə hazırıq və bunun müqabilində Ermənistan üçün də analoji əlaqənin təmin olunmasını gözləyirik. Xüsusilə, Yerasxdan (Arazdəyən) Mehriyə dəmir yolu əlaqəsinin təmin edilməsi vacibdir. Çünki Ermənistanın öz ərazisindən cənubdan şimala dəmir yolu çəkməsi ölkənin dağlıq və sərt quruluşuna görə çox çətindir”, – baş nazir bildirib.
Paşinyan əlavə edib ki, bu, Azərbaycandan Türkiyəyə Ermənistan ərazisindən keçməklə və əksinə dəmir yolu əlaqəsinin təmin olunması deməkdir:
“Bundan əlavə, bura Azərbaycandan Türkiyəyə və Türkiyədən Azərbaycana quru daşımaların təmin edilməsi daxildir.
Bu o deməkdir ki, Ermənistan Azərbaycan ərazisindən keçən dəmir və avtomobil yolları ilə də İran və Rusiyaya çıxa bilər. Əlbəttə, bu çərçivədə Ermənistan-Türkiyə dəmir yolunun açılması da nəzərdə tutulur və proses bu şəkildə getməlidir”./teleqraf.com
