ABŞ-nin vitse-prezidenti J.D.Vens hesab edir ki, hər iki tərəfin danışıqlara hazır olduqları barədə açıq bəyanatlarına baxmayaraq, Ukrayna və Rusiyanın sülh sazişi ilə bağlı mövqeləri arasında “çox böyük uçurum” qalmaqdadır.
Bu barədə “Fox News” telekanalına müsahibəsində danışan Vensin fikrincə, müharibəyə son qoymaq üçün ilk addım hər iki tərəfdən aydın təkliflər almaqdır: “Və bu, həqiqətən də baş verdi. Ukraynalılar dedilər: “Bizim istədiyimiz budur”. Ruslar da istədiklərini dedilər. İndi diplomatiyanın vəzifəsi bu mövqeləri bir-birinə yaxınlaşdırmağa çalışmaqdır. Lakin onlar arasında hələ də çox böyük uçurum var”.
Vens əlavə edib ki, Tramp administrasiyası hər iki tərəfin böyük itkilərini dayandıracaq uzunmüddətli həll yolu axtarır.
Qeyd edək ki, Vladimir Putin mayın 8-dən 11-dək müvəqqəti atəşkəs elan etsə də, Ukrayna bu təklifi rədd edib. Tramp da öz növbəsində Ukraynaya yeni raket zərbələrindən sonra Moskvanın səmimiliyini şübhə altına alıb.
Gələcək perspektivləri şərh edən Vens isə deyib: “Mən Konqresə güvənirəm. Beynəlxalq tərəfdaşlarımıza müəyyən dərəcədə inamım var. Gəlin görək növbəti 100 gün ərzində işlər necə inkişaf edəcək”. /azpolitika.info
