Məlum olduğu kimi, Hindistan iyun ayında Ermənistana “Akaş” raket kompleksinin növbəti partiyasını göndərəcək.
İrəvan Yeni Dehli ilə bağladığı 710 milyon dollarlıq silah sazişinin növbəti partiyasını qəbul edəcək.
Rusiyada fəaliyyət göstərən Xəzər Strateji Araşdırmalar İnstitutunun baş direktoru, “Milli Müdafiə” jurnalının baş redaktoru, siyasi analitik İqor Korotçenko hesab edir ki, Qarabağ müharibəsindəki məğlubiyyətindən və xarici siyasət oriyentasiyasının Qərbə doğru dəyişməsindən sonra Ermənistan əsas silah və hərbi texnika növlərinin təchizatı mənbələrini diversifikasiya etmək üçün addımlar atıb. “Bura Fransa və Hindistanın İrəvanın yeni əsas tərəfdaşlarına çevrildiyi hava hücumundan müdafiə sahəsi də daxildir. Hazırda hər iki ölkə Ermənistana hava hücumundan müdafiə sistemləri və komplekslərinin çatdırılması üzrə müqavilələr həyata keçirir və bu proses mərhələli şəkildə – sadədən mürəkkəbə doğru aparılır”.
Onun sözlərinə görə, gələcəkdə Ermənistan Fransanın texnoloji həlləri əsasında inteqrasiya olunmuş və ardıcıl hava hücumundan müdafiə sistemi yaratmağı planlaşdırır. “Bu sistemə Fransa və Hindistanın hava hücumundan müdafiə raket sistemləri daxildir”.
“Milli Müdafiə” jurnalının redaktoru qeyd edib ki, “Akaş” Cənubi Qafqaz hərbi əməliyyatlar teatrında nisbətən müasir hava hücumundan müdafiə sistemi hesab olunur. “Hindistanla müqavilənin məqsədi ondan ibarətdir ki, Nikol Paşinyanın hərbi proqramının prioritetlərindən biri NATO standartlarına əsaslanan laylı və dərin hava hücumundan müdafiə sistemi yaratmaqdır”.
O vurğulayıb ki, Ermənistan üçün “potensial düşmən” hələ də Azərbaycandır və bu məsələdə heç nə dəyişməyib. “Ermənistan tərəfindən bütün müasir silah sistemlərinin alınması və bütün zabit hazırlığı proqramları Azərbaycanla yeni hərbi münaqişə ehtimalı nəzərə alınmaqla həyata keçirilir”.
İqor Korotçenko sonda qeyd edib ki, Ermənistan Hindistandan “Akaş” hava hücumundan müdafiə sistemlərini almaqla öz gücünü nümayiş etdirməyə və Cənubi Qafqazda əlverişli siyasətini irəli sürməyə, ilk növbədə, Azərbaycannın hərbi imkanlarını zərərsizləşdirməyə çalışır. “Bu, Ermənistanın pərdə altından müxtəlif hərbi təxribatlar və ya gələcək döyüş əməliyyatlarını həyata keçirə biləcəyi hava hücumundan müdafiə çətirinin yaradılması deməkdir”.
