Prezident İlham Əliyevin tapşırığına uyğun olaraq, işğaldan azad edilmiş ərazilərə Böyük Qayıdış davam etdirilir.
Ağdam rayonunun Kəngərli kəndinə köç edənlər respublikanın müxtəlif yerlərində, əsasən yataqxanalarda, sanatoriya və inzibati binalarda müvəqqəti məskunlaşmış ailələrdir.
Bu mərhələdə Kəngərli kəndinə 50 ailə – 207 nəfər köçürülüb.
Doğma yurda qayıdan sakinlər hərtərəfli dövlət qayğısı ilə əhatə olunduqlarına görə Prezident İlham Əliyevə və Birinci vitse-prezident Mehriban xanım Əliyevaya təşəkkür ediblər.
Onlar, həmçinin torpaqlarımızı işğaldan azad edən rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını bildirib, bu yolda canlarından keçən şəhidlərimizə rəhmət diləyiblər.
Ağdam sakini Allahverdiyeva Tabatın sözlərinə görə, Ağdama qayıdış sevincini heç nə ilə təsəvvür etmək mümkün deyil.
“Allah Prezidentimizi qorusun, şəhidlərimizi rəhmət eləsin, qazilərimizə cansağlığı versin. İlk öncə getmək istədiyim yerlərdən biri atamın məzarını ziyarət etməkdir. Uzun illərdən sonra bu ziyarətin mənə qismət olduğuna sevinirəm”, – deyə o qeyd edib.
Doğma yurdum Ağdam mənim üçün hər yerdən, hər məkandan daha əzizdir.
Bunu isə digər Ağdam sakini Babayev Əjdər deyib. Onun sözlərinə görə, 32 il öncə öz yurdunu tərk etmək məcburiyyətində qalıb.
“Allah heç kimi vətənsiz eləməsin. İndi öz yurduma qayıtdığım üçün çox sevinirəm. Allah Prezidentimizi qorusun. Allah şəhidlərimizə rəhmət eləsin, qazilərimizə cansağlığı versin”, – deyə o qeyd edib.
Qeyd edək ki, hazırda Qarabağda və Şərqi Zəngəzurda, ora köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 40 mindən çox insan yaşayır.
