“Rusiya haqqı çatmayanı, Ukrayan isə qaytara bilmədiyini istəyir”
ABŞ Dövlət katibi Marko Rubio Senatda keçirilən dinləmələrdə çətin anlar yaşayıb.
Xarici KİV xəbər verir ki, senatorlar Rubionu Donald Trampın Ukrayna siyasətinin uğursuzluğuna görə sorğu-sual ediblər.
Konqresmen Cinn Şeyxin Donald Tramp administrasiyasının Rusiyanın Ukraynadakı müharibəsinə son qoymaq üçün danışıqlar aparmaq səylərinin nəticə vermədiyini qeyd edərək, bu uğursuzluğa görə Trampı tənqid edib. O, Prezident Trampın Vladimir Putinlə bazar ertəsi baş tutan telefon danışığının Ukrayna və müttəfiqlərinin ümid etdiyi kimi, dərhal atəşkəslə nəticələnmədiyini və bunun əvəzində Vladimir Putinin danışıqları davam etdirməyi təklif etdiyini, Trampın da bununla razılaşdığını bildirib.
“Vladimir Putinin indi gördüyü iş vaxt uzatmaqdır.O, prezidentlə skripkada oynayan kimi oynayır” – deyə, qeyd edib.
Rubio bu iddia ilə razılaşmayaraq Trampın müharibəni bitirməyə çalışdığını deyib. Problemin mahiyyətini açıqlamağa çalışan Rubio deyib: “Rusiya hazırda sahib olmadığını və haqqı olmayanı, Ukrayna isə hərbi yolla geri ala bilmədiklərini istəyir. Və problemin məğzi budur”.
O, Rusiya və Ukrayna nümayəndə heyətləri arasında İstanbuldakı danışıqları müsbət addım adlandırıb, lakin Ağ Evin hələ də “sülhə doğru addımlar görmədiyini” etiraf edib.
Rubio qeyd edib ki, Donald Trampla telefon danışığı zamanı Putin Vaşinqtona Ukraynada atəşkəslə bağlı şərtlərini çatdıracağına söz verib: “Bizim anlayışımız odur ki, ruslar atəşkəs şərtlərini yazacaqlar. Bu, daha geniş danışıqlara imkan verəcək. Biz bu şərtləri gözləyirik və bu şərtləri görəndə cənab Putinin hesablamalarını daha yaxşı başa düşəcəyik”.
Rubio Trampın müharibəyə son qoymaq səylərini müdafiə edib, həmçinin Amerika Prezidentinin Moskvaya qarşı sanksiyalar tətbiq etmək istəməməsinə haqq qazandırıb: “O, sülh istiqamətində hər iki tərəfə təsir etmək qabiliyyətini mümkün qədər uzun müddət saxlamaq istəyir “.
Xatırladaq ki, mayın 19-da ABŞ Prezidenti ilə Kreml rəhbəri arasında iki saatlıq telefon danışığı olub. Avropalı müttəfiqlər Trampın Putinlə söhbətdən Rusiyaya təzyiqi artırmaq, o cümlədən yeni sanksiyalar tətbiq etmək üçün istifadə edəcəyini gözləyirdilər, lakin o, bundan çəkindi.
Amerika lideri Putinlə söhbətini “əla” adlandırıb və deyib ki, Kiyev və Moskva dərhal atəşkəslə bağlı sülh danışıqlarına başlayacaq. Putin isə atəşkəsin “yalnız müəyyən şərtlər yerinə yetirildikdən sonra” mümkün olduğunu deyib və faktiki olaraq ABŞ-nin təklifini yenidən rədd edib.
Qərb mediası yazıb ki, Trampın Rusiyaya qarşı yumşaq mövqeyi Avropa liderlərinin narahatlığına səbəb olub. Daha sonra Tramp jurnalistlərə deyib ki, o, Putinin sülhə sadiq olduğuna inanır və o, yalnız sülh danışıqlarına zərər vermək istəmədiyi üçün sanksiyalar tətbiq etmir.
Bu nəticəsiz və uzandıqca uzanan söhbətlər, danışıqlar fonunda isə Rusiyanın Ukraynaya hücumu və dinc şəhərlərin bombalanması tam sürətilə davam edir. Rusiya açıq-aşkar böyük yay hücumu kampaniyasına hazırlaşır… /azpolitika.info
