Azərbaycanda qurbanlıq qoyunların qiymətində kəskin bahalaşma müşahidə olunur.
Bakı bazarlarında satışa çıxarılan qurbanlıq qoyunların qiyməti 300 manatdan başlayır. Ötən il isə bu rəqəm 180-230 manat arasında olub.
Qiymətləri öyrənmək üçün Bakının müxtəlif yerlərində araşdırma apardıq.
Yolumuzu ilk olaraq şəhərin Yasamal rayonu ərazisində “ətçilər” kimi tanınan ət satışı mağazalarından saldıq. Qəssabların sözlərinə görə, bu il satışa çıxarılan qurbanlıq qoyunların əksəriyyətinin qiyməti standartdır:
“Diri qoyunların qiyməti təxminən 300 manatdır. Amma bir çox adam qurbanlıq alarkən diri heyvana deyil, çəkiyə üstünlük verir. Çəki ilə satılan qurbanlıq qoyun ətinin bir kilosunun qiyməti 21-22 manatdır. Əgər qoyunun çəkisi 15 kilodan artıq gələrsə, bu zaman onun bir kilosunun qiymətini alıcıya 19-20 manata təklif edirik”.
Maştağa qəsəbəsində isə diri qurbanlıq qoyunların qiyməti mərkəzə nisbətdə daha bahadır. Satıçılar diri qoyunların qiymətlərinin 350-400 manat arasında olduğunu bildirib:
“Qoyunların çəkisi də çoxdur, təxminən 25-30 kq arasındadır. Çəki ilə isə qoyun ətinin qiyməti 20-21 manata satırıq. Bu gün 6 aylıq quzu ətinin qiyməti 22-23 manat arasındadır”.
Qəssablar deyir ki, qurbanlıq alarkən əhalinin əksəriyyəti diri heyvana, imkansız əhali isə əsasən çəki ilə ət almağa üstünlük verir.
