Rusiya-Azərbaycan gərginliyi fonunda indi də diaspor nümayəndələrimizə qarşı zorakılıq aktları törədilir. Təbii ki, bu, nə beynəlxalq hüquqa, nə vətəndaş-dövlət münasibətlərinə, nə də Rusiya-Azərbaycan münasibətlərinə uyğundur. Amma qəribəsi odur ki, Rusiya yenə də öz günahını görməzdən gəlir, özbaşına, cinayətkar fəaliyyətinə görə Azərbaycanı ittiham etməyə çalışır.
Milli Məclisin deputatı Hikmət Babaoğlu Oxu.Az-a açıqlamasında Moskvanın bu davranışlarının qəbul edilməz olduğunu deyir:
“Məsələ ondan ibarətdir ki, bu gün total və aydın şəkildə etnik mənsubiyyətinə görə azərbaycanlılara qarşı cinayətlə törədilir, onlar təqib olunur, işgüzar nüfuzlarına zərbələr vurulur və bu şovinist rəftarın davam etdiyi bir vaxtda, Rusiya rəsmiləri Azərbaycana qarşı informasiya müharibəsi də başladır və baş verənlərin səbəbkarı kimi Azərbaycan göstərilir. Əlbəttə ki, bu, yol verilməzdir. Demək ki, burada sistemli bir plan var. Yəni, həm bu cinayətlər törədilir, həm də onu dəstəkləyən informasiya və diplomatiya müharibəsi təşkil olunur”.
“Lakin Azərbaycan bu gün elə bir qüdrətə malikdir ki, bütün bunlara adekvat cavab verməyə hazırdır və bu cavab da verilir. Azərbaycanın maraqları qorunur, vətəndaşlarımızın maraqları qorunur və dünyanın harasında yaşamasından asılı olmayaraq, bütün azərbaycanlıların hüquqları və təhlükəsizliyi üçün tədbirlər görülür. Ona görə də Azərbaycan Prezidenti “mən dünyada yaşayan bütün azərbaycanlıların prezidentiyəm” demişdi. Bu gün bu cinayətlərin cavabsız qalmaması, Azərbaycanda da bu istiqamətdə müxtəlif tədbirlərin həyata keçirilməsi məhz bu fəlsəfədən irəli gəlir”, – deyə deputat vurğulayıb.
Müsahibimiz əlavə edib ki, Rusiya tərəfi yeni reallığı qəbul etməlidir:
“Moskva başa düşməlidir ki, Azərbaycana təzyiq etməklə istədiyini yeridə bilməz. Bu, artıq tarixdə qaldı. Yaxşı olar ki, Rusiya 2022-ci ilin 22 fevralında imzalanmış Qarşılıqlı müttəfiqlik fəaliyyəti haqqında Bəyannaməyə yenidən nəzər salsın. Bəyannamədə bir-birinin daxili işlərinə qarışmamaq və bərabərhüquqlu tərəfdaşlıq etmək öhdəliyi var. Bu öhdəliyə əməl etmək tərəflər üçün daha yaxşıdır”.
