Bu gün, iyulun 14-də ABŞ Prezidenti Donald Tramp NATO-nun baş katibi Mark Rutte ilə görüşündə Ukraynadakı müharibə, Rusiyaya qarşı sanksiyalar və Amerika silahlarının tədarükü ilə bağlı bir sıra mühüm açıqlamalar verib. Belə açıqlamaların olacağı barədə Tramp Tramp özü 2 gün əvvəl anons vermişdi.
UNIAN-a istinadla Donald Trampın əsas bəyanatlarını dərc edirik:
Ukraynaya silah tədarükü
Tramp Ağ Evdə NATO-nun baş katibi Mark Rutte ilə görüşündə Ukraynaya 17 “Patriot” zenit-raket kompleksinin göndəriləcəyini bildirib. O qeyd edib ki, bu, batareyaları olan tam dəst olacaq və ilk sistemlər çox tezliklə gələcək.
Bundan əlavə, Tramp Ukraynanın təkcə “Patriot” hava hücumundan müdafiə sistemləri almayacağına eyham vurub.
“Ukrayna həm hava hücumundan müdafiə, həm də raketlər, döyüş sursatları və sair üçün həqiqətən böyük miqdarda hərbi texnika əldə edə biləcək”, – ABŞ Prezidenti bildirib.
Tramp həmçinin Ukraynaya silah tədarükü ilə bağlı Avropa İttifaqı ilə razılığın əldə olunduğunu açıqlayıb. O, xərclərin Avropanın üzərinə düşəcəyini qeyd edib.
Rusiyaya qarşı ikinci dərəcəli sanksiyalar və tariflər
Bundan əlavə, Tramp 50 gün ərzində Ukrayna ilə atəşkəs razılaşması əldə olunmasa, Rusiyaya 100 faizlik tariflər tətbiq etmək niyyətində olduğunu bildirib. O, həmçinin Rusiya neftini alan digər ölkələrə ikinci dərəcəli sanksiyalar tətbiq etməklə hədələyib.
“Ümid edirəm ki, bunu etmək məcburiyyətində qalmayacağıq”, Tramp əlavə edib.
Putindən məyusluq
Bundan əlavə, Tramp Rusiyaya və Kremlin rəhbəri Vladimir Putinə münasibətini niyə indi dəyişdiyini izah edib. O, rus diktatorunun onu aldatmağa çalışmasından bezdiyini deyib.
“Mən Putinlə tez-tez müharibənin necə bitəcəyi ilə bağlı danışıram. Həmişə telefonu qapayıb deyirəm: “Yaxşı, bu, gözəl telefon zəngi idi”. Sonra Kiyevə raket atırlar və mən deyirəm ki, bu qəribədir. Üç-dörd dəfə belə olandan sonra deyirsən ki, söhbət heç bir məna kəsb etmir. O, bir çox insanı aldatdı, Klintonu, Buşu, Obamanı, Baydeni aldatdı”.
Trampın sözlərinə görə, Rusiyanın ABŞ ilə ticarət üçün “böyük potensialı” var. Lakin ondan Ukraynaya qarşı müharibə üçün istifadə edir.
“Düşünürəm ki, Putinin nöqteyi-nəzərindən bir ölkənin iqtisadiyyatının məhv olması yaxşı hal olmaz. O, öz iqtisadiyyatını xilas etməlidir. Müəyyən mənada ölkəsini xilas edə bilər. Amma Rusiya iqtisadiyyatı çökə bilər. Potensial olaraq, bu, böyük ölkədir. Amma iqtisadiyyatına baxın. Və “50 gün” təhlükədir. Bu, çox ağır zərbə vuracaq”, – Tramp deyib.
ABŞ Prezidenti Rusiya Prezidentindən məyus olduğunu vurğulayıb. O qeyd edib ki, Kreml rəhbəri ilə atəşkəslə bağlı danışıqlar apara biləcəyini düşünür.
Həmçinin, Tramp NATO-nun baş katibi ilə görüşü zamanı ukraynalıların Rusiyaya qarşı döyüşlərdə böyük şücaət göstərdiyini bildirib. O qeyd edib ki, eyni zamanda Rusiya Ukrayna şəhərlərinə hər gün yüzlərlə pilotsuz təyyarə və raket buraxır.
“Onlar sadəcə çaxnaşma salırlar, şəhərləri vururlar. Bu, həqiqətən də dəhşətlidir. Bu o deməkdir ki, çoxlu insanlar ölür, həmçinin infrastruktur, bütün şəhər məhv olur”, – ABŞ Prezidenti əlavə edib.
NATO Ukraynaya silahları sürətlə ötürəcək
NATO-nun baş katibi Mark Rutte birgə mətbuat konfransında ABŞ Prezidenti Donald Trampa Ukraynanı dəstəklədiyinə görə təşəkkür edib. O, Alyansın pulu necə ödəyəcəyini və silahların Ukraynaya tez təhvil verəcəyini açıqlayıb.
Rutte qeyd edib ki, Ukraynaya silah göndərilməsinin əvəzini Avropa ölkələri ödəyəcək. O hesab edir ki, bu, tamamilə məntiqlidir.
“Almaniya, Finlandiya, Danimarka, İsveç, Norveç, Hollandiya Krallığı, eləcə də Kanada – onların hamısı bunun bir hissəsi olmaq istəyir. Bu, yalnız birinci dalğadır. Başqaları da olacaq. Biz ukraynalıların nəyə ehtiyac duyduğunu bilirik. Biz NATO sistemləri vasitəsilə silah paketlərini onlara ötürəcəyik”.
