Donald Trampın Vladimir Putinə 50 gün vaxt verməsilə bağlı bəyanatı müxtəlif dairələr tərəfindən fərqli yozulmaqdadır. Bir çoxları bu ultimatumu zəif və qeyri-ciddi qəbul edərkən, onu həlledici xəbərdarlıq kimi təqdim edənlər də var.
Xarici KİV xəbər verir ki, Cənubi Karolinadan olan respublikaçı senator Lindsi Qrem ABŞ Prezidenti Donald Trampın Rusiya ilə Ukrayna arasında sülh razılaşmasının əldə olunması üçün 50 günlük müddətlə bağlı bəyanatını şərh edərkən maraqlı fikir söyləyib.
Onun sözlərinə görə, bu müddətə məhəl qoyulmasa, Moskva üçün nəticələr son dərəcə ciddi ola bilər: “Putin və başqaları 51-ci gündə nə baş verəcəyini bilmək istəyirlərsə, mən onlara Ayətullaha (Xameneiyə-red.) zəng etməyi məsləhət görərdim”. “X” səhifəsində bu cür paylaşım edən tanınmış senator bununla da İranın ali lideri Əli Xamneiyə və İsrailin İrana son hücumuna işarə edib.
Senator həmçinin bildirib ki, ucuz rus neftini alan və bununla da “Putinin müharibə maşını”nı dəstəkləyən hansısa ölkənin nümayəndəsi olsaydı, Trampın bəyanatını çox ciddi qəbul edərdi.
Qrem Prezidentin NATO ölkələri tərəfindən sonradan Ukraynaya təhvil verilməsi üçün ABŞ-dən silah almaq təşəbbüsünü yüksək qiymətləndirib. O, bu mexanizmin elan edilməsi faktını “yaxşı xəbər” adlandırıb.
Bundan əlavə, senator Trampın Rusiya neftini almağa davam edən ölkələr üçün 100%-lik tariflərin tətbiqi ideyasının vacibliyini vurğulayıb. Onun fikrincə, bu cür tədbirlər Rusiyanı “ən ağrılı yerindən” vuracaq.
Xatırladaq ki, iyulun 14-də Donald Tramp demişdi ki, Rusiya 50 gün ərzində Ukrayna ilə sülhə razılıq verməlidir, əks halda ona və ticarət tərəfdaşlarına qarşı sərt iqtisadi tədbirlər, o cümlədən ikili sanksiyalar və 100%-lik tariflər tətbiq olunacaq. Mediada isə Trampın Volodimir Zelenskiyə Moskvanı və Peterburqu vurmağı təklif etdiyi, eləcə də ABŞ-nin Kiyevə uzaq mənzilli “Tomoqavk” raketləri verəcəyi barədə məlumatlar dərc edilib. Lakin Tramp bu məlumatları təkzib edib./azpolitika.info
