Ukrayna Prezidenti Volodimir Zelenski Rusiyanın ərazisindəki enerji obyektlərinə son hücumları şərh edib. Onun sözlərinə görə, bu hücumlar “ruslara müharibəni davam etdirməyin qiymətini hiss etdirmək” məqsədi daşıyır.
Zelenski Kiyevdə Niderlandın Baş naziri Dik Sxofla keçirdiyi mətbuat konfransında bildirib: “Ruslar bu müharibə dövründə ukraynalıların yaşadığı qaranlıqların, sınaqların qiymətini anlamırlar. Burada məsələ onların mənəviyyatında deyil – çünki o yoxdur, məsələ fiziki hissdədir. Ukrayna mülki vətəndaşları öldürmür. Amma onlar bu müharibənin qiymətini anlamalıdırlar”.
Prezidentin sözlərinə görə, Ukrayna Rusiyanın zərbələrinə cavab olaraq yalnız hərbi və enerji obyektlərini hədəf alır: “Biz bunu etmək istərdikmi? Əlbəttə, yox. Biz müharibənin bitməsini istəyirik. Amma ruslar – hələ ki, bunu istəmirlər. Onların gündəlik həyatı narahat olanda, öz rəhbərlərinə suallar verməyə başlayacaqlar.”
Zelenski daha əvvəl də bildirmişdi ki, əgər Rusiya zərbələri nəticəsində Kiyevdə “blackout” (enerji kəsintisi) baş verərsə, Ukrayna da Moskvanı işıqsız qoymaq gücündədir.
Ukrayna lideri vurğulayıb ki, son həftələr Rusiyanın dərin arxa bölgələrindəki neft emalı zavodlarına və enerji infrastrukturuna hücumlar yalnız Ukraynanın öz silahları ilə həyata keçirilir: “Artıq söhbət təkcə pilotsuz aparatlarla zərbələrdən getmir”.
Son günlər Rusiya ərazisində, xüsusilə Belqorod və Tümen vilayətlərində ardıcıl partlayışlar və yanğınlar qeydə alınıb. Rəsmilər bildiriblər ki, Tümen Neft Emalı Zavodu bazar ertəsi üç dronun hücumuna məruz qalıb, partlayış səsləri eşidilib.
Belqorod vilayətinin qubernatoru Vyaçeslav Qladkovun sözlərinə görə, “Luç” elektrik yarımstansiyasına endirilən hücum nəticəsində iki nəfər ölüb, on minlərlə sakin işıqsız qalıb. Eyni obyektə bir neçə gün öncə də zərbə endirilmişdi.
Xatırladaq ki, Rusiya ordusu müharibə başlayandan bəri Ukraynanın enerji infrastrukturlarına mütəmadi hücumlar həyata keçirir. Ukraynanın cavab zərbələri isə son vaxtlar artıq Rusiyanın daxili sənaye və enerji obyektlərinə qədər uzanır. /azpolitika.info
