ABŞ Prezidenti Donald Tramp Ukraynaya “Tomahawk” raketlərinin göndərilməsi barədə qərarını demək olar ki, verdiyini açıqlayıb.
Qərarı şərh edən siyasi şərhçi Şahin Cəfərli qeyd edib ki, Tramp bu qərarı açıqlayarkən “Lakin əvvəlcə bu raketlərlə nə etmək istədiklərini bilmək istərdim. Bunu onlardan soruşacağam”, – deyə vurğulayıb.
Şahin Cəfərli deyib ki, bu açıqlama ilə Tramp Ukraynaya mesaj verir ki, hansı hədəflərə zərbə endiriləcəyi əvvəlcədən ABŞ-la bölüşülməli və razılaşdırılmalıdır.
O qeyd edib ki, bu, şübhəsiz şəkildə belə olmalıdır. Ən azı ona görə ki, ABŞ hərbçilərinin iştirakı olmadan Ukrayna bu raketlərdən istifadə edə bilməz. Onun sözlərinə görə, raketin koordinatlar üzrə hədəfə yönləndirilməsi yalnız amerikalılar tərəfindən həyata keçirilə bilər.
Şahin Cəfərli qeyd edib ki, əgər Ukraynaya “Tomahawk”ların verilməsi barədə qərar qətiləşərsə, bu, ABŞ-dakı yeni administrasiyanın Rusiya–Ukrayna müharibəsinə dair siyasətində radikal dönüş baş verdiyinin göstəricisi olacaq.
O bildirib ki, sülh istiqamətində diplomatik cəhdlərin Rusiyanın uzlaşmaz mövqeyi ucbatından nəticə verməməsindən sonra Tramp “Güc vasitəsilə sülh” (“Peace through strength”) adlanan reyqanist konsepsiyaya keçməyə hazırlaşır.
Şahin Cəfərli vurğulayıb ki, “Tomahawk” raketləri əsas etibarilə gəmilərdən buraxılmaq üçün hazırlanaraq 1983-cü ildən ABŞ ordusunun arsenalına daxil olub.
O qeyd edib ki, bu raketlər ilk dəfə 1991-ci ildə Körfəz müharibəsində İraqa qarşı tətbiq edilib.
Cəfərli əlavə edib ki, raketin dəniz modifikasiyasının atəş məsafəsi 2500 km-dir. Bununla yanaşı, 1800 km məsafəyə uçan “yer-yer” modifikasiyası da mövcuddur və Ukraynaya məhz bu tip raketlərin verilməsi gözlənilir.
Şahin Cəfərli bildirib ki, “Tomahawk” raketləri yerdən 30–50 metr yüksəklikdə uçaraq radara çətin yaxalanan, yüksək dəqiqliyə malik qanadlı raketlərdir. Onun sözlərinə görə, bu raketlərin hədəfdən yayınma məsafəsi 5 metr təşkil edir.
O əlavə edib ki, “Tomahawk” möcüzəvi bir silah olmasa da, bu raketlər Ukraynanın öz istehsalı olan “Flaminqo” raketləri ilə birlikdə raket silahlanması sahəsində Rusiya lehinə olan kəskin disbalansı – tam olmasa da – ciddi şəkildə aradan qaldırmağa imkan verə bilər.
Cəfərli bildirib ki, görünür, Tramp düşünür: Rusiyanın bu sahədə bariz üstünlüyünü itirməsi onu danışıqlar masasında daha konstruktiv mövqe tutmağa sövq edə bilər.
Şahin Cəfərli xatırladıb ki, Putin Ukraynaya hücumun səbəblərindən danışarkən dəfələrlə bəyan edib: “Biz bunu etməsəydik, tezliklə ABŞ və NATO Ukraynaya Moskvanı və Sankt-Peterburqu vura biləcək raketlər yerləşdirəcəkdi.”
Cəfərli qeyd edib ki, bu bəyanatlardan və Avropanın şərqində böyük müharibə cinayətləri törətməyə başlamasından sonra əksinə proseslər baş verib.
O bildirib ki, əvvəlcə Peterburqun yaxınlığındakı Finlandiya NATO-ya qoşulub və nəticədə Rusiyanın bu hərbi ittifaqla quru sərhədlərinin uzunluğu iki dəfə artıb.
İndi isə ABŞ Prezidenti Ukraynaya qanadlı raketlər göndərməkdən danışır.
Şahin Cəfərli əlavə edib ki, iki gün əvvəl Vladimir Putin bəyan etmişdi: əgər Ukraynaya “Tomahawk” verilsə, bu, Rusiya–ABŞ münasibətlərinin sonu olacaq.
Lakin Ş. Cəfərli vurğulayıb ki, belə görünür, bu xəbərdarlıq Trampı qorxutmayıb. /azpolitika.info
