“Putin AZAL təyyarəsinin vurulmasına görə məsuliyyəti yenə Ukraynanın üzərinə qoymağa çalışır. Onun sözlərindən belə nəticə çıxır ki, əgər Çeçenistan səmasında Ukrayna dronları olmasaydı, Rusiya hərbçiləri Azərbaycanın mülki təyyarəsinə atəş açmazdılar.”
Bu fikirləri politoloq Elxan Şahinoğlu Rusiya Prezidenti Vladimir Putinin Azərbaycan Prezidenti İlham Əliyevlə Düşənbədə baş tutan görüşünü şərh edərkən bildirib.
Politoloq vurğulayıb ki, Putin təyyarənin raketlə vurulması faktını hələ də qəbul etmir və buna görə də iddia edir ki, guya təyyarəyə yalnız raketin qəlpələri dəyib.
Elxan Şahinoğlu əlavə edib ki, Putin eyni zamanda Rusiyanın istintaqa bütün lazımi dəstəyi göstərdiyini və faciənin hərtərəfli araşdırılmasına açıq olduğunu qeyd edib. Politoloq sual edib: “Əgər Putin araşdırmanın yekunlaşmadığını deyirsə, o zaman raketin təyyarəyə dəymədiyi iddiasını niyə irəli sürür?”
Politoloq diqqətə çatdırıb ki, Azərbaycan Prezidentinə müraciətində Putin “hadisənin Rusiyanın hava məkanında baş verməsinə görə Sizdən üzr istəyirəm. Həlak olanların ailələrinə ən səmimi başsağlığımı çatdırıram” sözlərini səsləndirib.
O həmçinin vurğulayıb ki, Putin Rusiyanın AZAL təyyarəsinin qəzaya uğraması ilə bağlı bütün məmurların hərəkətlərinə hüquqi qiymət veriləcəyini və ölkəsinin bu faciə ilə əlaqədar zərərçəkənlərə kompensasiya ödəyəcəyini bildirib. Politoloq bu addımı Rusiyanın Azərbaycanın mülki təyyarəsinin vurulmasına və vətəndaşlarımızın həlak olmasına görə məsuliyyətini etiraf kimi qiymətləndirib.
Elxan Şahinoğlu qeyd edib ki, əgər Putin bu mövqeni ilk gündən səsləndirsəydi, Azərbaycan-Rusiya münasibətləri bu qədər gərginləşməzdi. Onun sözlərinə görə, münasibətlərin normallaşması Putinin verdiyi vədlərin – rusiyalı məmurların məsuliyyətə cəlb edilməsi və kompensasiyaların ödənilməsi – necə yerinə yetiriləcəyindən asılı olacaq.
Politoloq həmçinin ümid edib ki, Putin məmurlarına Rusiyada azərbaycanlıların incidilməsi və bəzi hallarda zorakılığa məruz qalması hallarına son qoyulması ilə bağlı tapşırıq verəcək.
Elxan Şahinoğlu əlavə edib ki, bütün hallarda münasibətlərdəki gərginlik hər iki ölkənin maraqlarına uyğun deyil. /azpolitika.info
