Politoloq Elxan Şahinoğlu Ukrayna Prezidenti Volodimir Zelenskinin Avropa Şurasındakı çıxışını təhlil edib.
Ekspertin sözlərinə görə, Zelenski bir sıra vacib məqamlara toxunub: “Birincisi, Zelenski bildirib ki, Ukrayna ordusu 150-dən 3000 kilometrədək məsafədə yerləşən hədəfləri öz istehsalı olan uzaqmənzilli silahlarla vura bilir. Bununla o demək istəyib ki, Ukrayna ABŞ-dan uzaqmənzilli raketlər almaq istəyir, lakin bu silahlar olmasa belə, ölkə artıq Rusiyanın strateji obyektlərinə zərbə endirə biləcək imkanlara malikdir.
Prezident eyni zamanda vurğulayıb ki, ABŞ-dan alınan uzaqmənzilli silahlar Rusiya ərazisindəki hədəflərə qarşı istifadə edilməyib – bu, Vaşinqtonun əsas tələblərindən biridir. Bununla belə, Zelenski yaxın gələcəkdə “Tomaqavk” raketlərinə sahib olmaq istədiyini qeyd edib. Lakin ABŞ Prezidenti Donald Tramp bu raketlərin Ukraynaya verilməsi prosesini ləngidir”.
Ekspertin fikrincə, Ukraynaya verilməsi planlaşdırılan 50 “Tomaqavk” raketinin müharibədə ciddi dönüş yaradacağını demək çətindir: “Zelenski Ukraynanın iştirakı olmadan Rusiya və ABŞ liderləri arasında görüşün keçirilməsinə qarşı çıxır. Çünki işğala məruz qalan Ukraynadır və müharibənin hansı şərtlərlə dayandırılacağı barədə müzakirələrdə bu ölkənin iştirak etməsi vacibdir”.
Elxan Şahinoğlu əlavə edib ki, Zelenski ABŞ rəhbərliyinin Ukraynanın Rusiyanın işğal etdiyi ərazilərlə barışmasını istəməsini qəbul etmir: “Zelenski atəşkəsə razıdır, lakin Putin bu razılaşmanın müqabilində Kiyevdən işğal edə bilmədiyi əraziləri tələb edir. Kiyev bu alçaldıcı tələbi yerinə yetirməyəcək. Məhz buna görə ABŞ və Rusiya prezidentlərinin Budapeştdə planlaşdırılan görüşü təxirə salınıb. Putinin tələbinin məntiqsiz olduğunu Tramp da anlayıb. Zelenskinin mövqeyi qətidir: ‘Ukrayna Rusiyaya ərazi güzəştlərinə getməyəcək’.”
Politoloq xatırladıb ki, Ukrayna Prezidenti çıxışında Çin lideri Si Cinpinin siyasətinə də toxunub: “Zelenski deyib ki, Si Cinpin ona Rusiyaya silah satmayacağı barədə söz verib. Lakin bu vədin yerinə yetirilmədiyini bu şəkildə qiymətləndirib:‘Çin Rusiyaya kömək edir, Ukraynaya isə yardım etmir. Çin nə bizim qələbəmizdə, nə də Rusiyanın məğlubiyyətində maraqlıdır”. Bu, reallığı əks etdirir. Çinin xarici işlər naziri Van Yi Brüsseldə bəyan etmişdi ki, Rusiya məğlub olarsa, ABŞ diqqətini Çinə yönəldəcək və Pekinə təzyiqlər artacaq.”
Elxan Şahinoğlunun fikrincə, Rusiya-Ukrayna müharibəsi müəyyən mənada Pekinin maraqlarına da cavab verir: “Bu müharibə Rusiyanı zəiflədir və Kremlin Pekindən asılılığını daha da artırır.” /azpolitika.info
