Moskva şəhəri ötən axşamdan başlayaraq, kütləvi PUA hücumuna məruz qalıb.
Rusiya mediası hücumla bağlı paytaxtdan çoxsaylı foto və videolar yayımlayır. Həmin görüntülərdə müəyyən ərazilərdə güclü partlayışlar və tüstü buludlarının yüksəldiyi görünür. Rusiya “teleqram” kanalları isə iddia edir ki, Ukrayna pilotsuz təyyarələrindən biri çoxmərtəbəli binaya zərbə endirib.
Sosial mediada artıq Kremli “qoruyan” mobil hərbi qrupun fotosu yayılıb. Bunlar Kremlin qarşısında pulemyotlu pikapda olan rus əsgərləridir. Belə gförünür ki, Rusiya HHM sistemləri PUA-larla bacarmadığı üçün əlac bu cür pikaplarda quraşdırılan pulemyotlara qalıb və Kreml kimi strateji obyekt bu üsulla qorunur…
Moskva meri Sergey Sobyanin dediyinə görə, oktyabrın 26-sı axşamından bəri Rusiya hava hücumundan müdafiə qüvvələri Moskvaya yaxınlaşan 36 dronu vurub. Sobyanin PUA-ların vurduğu ziyan və itkilər barədə ətraflı məlumat verməyib.
Rusiya Müdafiə Nazirliyi isə ötən gecə ərzində 193 Ukrayna PUA-sının “tutulması” və “məhv edilməsi” barədə məlumat yayıb. Nazirlik xüsusilə, Moskva vilayəti üzərində 40 dronun vurulduğu, bunlardan 34-ünün birbaşa Moskvaya uçduğunu bildirib. Bryansk (47), Kaluqa (42) və Tula (32) bölgələri üzərində də çox sayda dronun məhv edildiyi bildirilir.
“Mash” kanalının məlumatına görə, Moskvaya edilən PUA hücumları zamanı Domodedovo, Podolsk, Dubna, Ramenskoye, Kommunarka, Troitsk və Kolomnada partlayış səsləri eşidilib. İki hava limanında – Jukovski və Domodedovoda təyyarələrin enişi və uçuşuna məhdudiyyətlər qoyulub.
Bu arada, PUA hücumu nəticəsində Moskva vilayətinin Serpuxov şəhərindəki neft anbarında yanğın baş verib. Həmçinin, Moskvanın bir hissəsi olan Kommunarkada meşəlik ərazidə də yanğın qeydə alınıb.
Qeyd edək ki, bu, oktyabr ayında paytaxt Moskvaya edilən ikinci kütləvi PUA hücumudur. Bu hücumların ən çox qeydə alındığı ay isə may ayı olub. /azpolitika.info
