Vladimir Putin Ukraynaya qarşı müharibəni davam etdirmək və döyüş meydanında qələbə qazanmaq niyyətində israrlıdır.
“NBC News”-un məlumatına görə, ABŞ kəşfiyyatının Konqresə təqdim edilən hesabatında belə deyilir.
Hesabata görə, kəşfiyyat orqanları ABŞ Prezidenti Donald Trampın sülh danışıqları aparmaq səylərinə baxmayaraq, Rusiyanın Ukrayna ilə bağlı güzəştə getmək istəyinə dair heç bir əlamət görmürlər.
Bu qiymətləndirmə, Amerika və Qərb kəşfiyyat orqanlarının 2022-ci ilin fevral ayından bəri Rusiya rejiminin mövqeyinə dair əvvəlki baxışları ilə üst-üstə düşür. Amerika rəsmilərinin fikrincə, indi Putin, Rusiya qoşunlarının kütləvi itkilərinə və ölkə daxilindəki iqtisadi çətinliklərə baxmayaraq, əvvəlkindən daha dərindən “öz mövqeyinə saplanıb”.
Kəşfiyyatın qiymətləndirməsinə görə, Putin insan və maliyyə itkilərini əsaslandırmaq üçün Ukrayna əraziləri üzərində Rusiyanın nəzarətini genişləndirmək niyyətindədir.
Ağ Ev öz növbəsində Trampın açıqlamalarına istinad edərək, ABŞ kəşfiyyatının hesabatına şərh verməkdən imtina edib: “Prezidentin dediyi kimi, bunlar(“Rosneft” və “Lukoil”-ə qarşı sanksiyalar-red.) Rusiyanın ən böyük iki neft şirkətinə qarşı əhəmiyyətli sanksiyalardır və o, ümid edir ki, bu sanksiyalar müharibənin bitməsinə kömək edəcək. ABŞ sülh yolu ilə həllin tərəfdarı olmağa davam edəcək, lakin daimi sülh yalnız Rusiyanın vicdanlı danışıqlar aparmaq istəyi şərtilə mümkündür.”
Avropalı diplomatların və keçmiş kəşfiyyat rəsmilərinin qeyd etdiyi kimi, yalnız yeni sanksiyalar, Ukraynanın Rusiyanın enerji infrastrukturuna zərbələri və Avropadan artan hərbi dəstək birgə Kremlin hesablamalarını və mövqeyini dəyişdirə bilər. /azpolitika.info
