Ukraynanın sülh müaviləsilə bağlı “qırmızı cizgiləri” var, onları heç kim poza bilməz.
Bunu Ukrayna Ali Radasının sədri Ruslan Stefançuk İsveç parlamentindəki çıxışında deyib.
BBC-nin məlumatına görə, Ukrayna parlamentinin sədri bildirib ki, Ukrayna Rusiya tərəfindən işğal edilmiş ərazilərin qanuni tanınmasına, Ukrayna silahlı qüvvələrinə və ya Ukraynanın gələcək ittifaqlarına məhdudiyyətlərə razı olmayacaq.
Stefançuk vurğulayıb ki, bu prinsipial qaydaları sülh danışıqlarında “heç kim poza bilməz”. O, həmçinin İsveç parlamentində deyib ki, Ukraynanın AB və NATO-ya üzvlüyü istənilən sülh planının bir hissəsi olmalıdır.
Daha əvvəl Ukrayna Prezidenti Volodimir Zelenski sülh danışıqlarındakı “əsas problemin” Vladimir Putinin Ukraynadan “oğurladığı” ərazinin qanuni tanınması tələbi olduğunu qeyd etmişdi.
“Bu, ərazi bütövlüyü və suverenlik prinsipini pozardı”, – deyə Prezident bildirib. O, həmçinin “sərhədlərin zorla dəyişdirilə bilməyəcəyini” vurğulayıb.
Bundan əlavə, Zelenski qeyd edib ki, hazırda mediada çoxlu səs-küy və çoxlu siyasi təzyiq var.
“Putin ərazi bütövlüyü və suverenlik prinsiplərini sarsıtmaq üçün oğurladığı şeylərin qanuni tanınmasını istəyir. O, bunu təkcə Ukraynadan deyil, bütün dünyadan istəyir. Və bu, çox təhlükəlidir”, – deyə o bildirib.
