Statistik göstəricilərə əsasən, Azərbaycana gələn ərəb turistlərin sayında azalma müşahidə olunur.
Bildirilir ki, ötən illə müqayisədə ərəb turistlərin sayı 3,5% azalıb.
Bəzi ekspertlərin fikrincə, azalmanın əsas səbəblərindən biri ərəb turistlərin alternativ turizm ölkələrinə üz tutmasıdır.
Həmçinin Azərbaycanda turizm xidmətlərinin bahalığı da onların başqa ölkələri seçməsinə səbəb olur.
Görəsən, bu azalma ancaq qiymətlərlə bağlıdır?
Maraqlıdır, bu gün Azərbaycanda turizmin səviyyəsi və rəqabət qabiliyyəti hansı rolu oynayır?
Mövzu ilə bağlı danışan Liberal İqtisadçılar Mərkəzinin sədri Akif Nəsirli bildirib ki, Azərbaycana gələn ərəb turistlərin sayındakı azalma təkcə qiymətlərin yüksək olması ilə bağlı deyil.
“Qiymət amili əlbəttə ki, rol oynayır, çünki turistlər ödədikləri məbləğə uyğun xidmət gözləyirlər. Amma məsələ daha genişdir. Əsas səbəblərdən biri regional rəqabətin artmasıdır.
Son illər ərəb turistləri üçün Türkiyə, Gürcüstan, Balkan ölkələri və hətta, Orta Asiya yeni və daha sərfəli alternativlər kimi ön plana çıxır. Bu ölkələr həm daha münasib qiymətlər təklif edir, həm də daha güclü marketinq kampaniyaları aparırlar.
Digər tərəfdən, Azərbaycanda xidmət səviyyəsi bərabər deyil. Bəzi obyektlər yüksək keyfiyyət təklif etsə də, bəzilərində xidmət mədəniyyəti, dil bilikləri və turist yönümlü yanaşma yetərli deyil”,-deyə o əlavə edib.
İqtisadçı qeyd edib ki, turistlər yalnız ucuz xidmət deyil, ödədikləri pulun qarşılığında dəyər görmək istəyirlər və bu gözlənti Azərbaycanın hər yerində ödənilmir.
“Marketinq məsələsi də önəmlidir. Bir neçə il əvvəl Azərbaycan ərəb ölkələrində aktiv şəkildə reklam olunurdu. Bu iş indi əvvəlki qədər güclü deyil. Turist axınını sabit saxlamaq üçün davamlı görünürlük lazımdır.
Əlavə olaraq, turistlərin axtardığı geniş əyləncə imkanları, ailəvi fəaliyyətlər və mövsümi rahatlıq baxımından Azərbaycan bəzi rəqiblərdən geri qalır. Yayların çox isti olması, qış turizminin məhdudluğu və böyük əyləncə mərkəzlərinin azlığı seçimləri məhdudlaşdırır.
Yəni nəticə olaraq, azalma qiymətlərin yüksəkliyi ilə bağlı olsa da, əsas səbəb yalnız bu deyil. Rəqabət, xidmət keyfiyyəti, infrastruktur və marketinq kimi faktorlar birlikdə təsir edir. Azərbaycanda turizmin potensialı böyükdür, amma rəqabət qabiliyyətinin artırılması üçün xidmətin keyfiyyəti, infrastruktur və qiymət-dəyər balansı üzərində daha sistemli iş aparılmalıdır”./gununsesi.info
