Ukrayna Prezidenti Volodimir Zelenski ABŞ Prezidentinin xüsusi nümayəndəsi Stiv Uitkoff və Donald Trampın kürəkəni Cared Kuşnerlə telefon danışığı aparıb.
Zelenskinin sözlərinə görə, danışıqlar “predmetli və konstruktiv” xarakter daşıyıb və əsas diqqət “qansızmanın dayandırılması”, Rusiyanın üçüncü dəfə genişmiqyaslı hücum ehtimalının aradan qaldırılması və Moskvanın öz öhdəliklərinə əməl etməyəcəyi risklərinin azaldılmasına yönəlib. Danışıqlarda Ukrayna Təhlükəsizlik və Müdafiə Şurasının katibi Rüstəm Umerov və Baş Qərargah rəisi Andrey Qnatov da iştirak edib. Onlar hazırda ABŞ-də səfərdədirlər.
“Axios” nəşrinin mənbələrinə görə, iki saat davam edən söhbətdə əsasən təhlükəsizlik təminatları və ərazi məsələləri müzakirə edilib. Mənbə bildirir ki, “ərazi məsələləri üzrə dialoq çətin keçib, çünki Rusiya hələ də Ukraynanın Donbasda nəzarət etdiyi ərazilərdən çıxmasını tələb edir”. ABŞ isə bu məsələnin həlli üçün yeni ideyalar axtarır.
Bununla belə, təhlükəsizlik təminatları üzrə tərəflər müəyyən irəliləyiş əldə edib və mövqelər bir qədər yaxınlaşıb. Mənbə deyib ki, Uitkoff və Kuşner hər iki tərəfin mövqelərini toplamaqla yanaşı, həm Putinə, həm də Zelenskiyə lazımi kompromislərə getmək üçün təzyiq göstəriblər.
ABŞ Prezidentinin Ukrayna üzrə xüsusi nümayəndəsi Kit Kellog isə şənbə günü bildirib ki, müharibənin dayandırılması ilə bağlı razılaşma həqiqətən də çox yaxındır. Onun sözlərinə görə, proses Donbasın gələcəyi və Zaporojye AES-in statusu ilə bağlı iki əsas məsələnin həllindən asılıdır: “Düşünürəm ki, bu iki məsələ həll olunsa, qalan hissə də öz-özünə yoluna düşəcək”.
Kellog əlavə edib ki, prosesin son 10 metri ən çətin hissədir.
Vladimir Putin də Kremlin görüşündən sonra bildirib ki, Rusiya ABŞ-nin irəli sürdüyü 28 bəndlik ilkin təklifin bir sıra hissələri ilə razılaşmayıb. ABŞ sonradan bu planı dörd ayrıca “paketə” bölməyi təklif edib.
Daha əvvəl Cenevrədə Avropa İttifaqı nümayəndələrinin iştirakı ilə aparılan danışıqlardan sonra təklifdəki bəndlərin sayının 28-dən 19-a endirildiyi bildirilmişdi.
Bu sənədlər rəsmi şəkildə dərc olunmasa da, 28 bəndlik plan mətbuata sızmış və Ağ Ev onun orijinallığını təkzib etməmişdi. Ukrayna və Avropa İttifaqının bəzi nümayəndələri planın bir sıra maddələrinin Rusiyanın xeyrinə olduğunu bildirsələr də, Kiyev bu planı danışıqlar üçün əsas kimi qəbul etməyə razılıq verib. /azpolitika.info
