Ramazan ayında iftar süfrələrinin təşkili, həmişəki kimi, gündəmin əsas mövzularından biridir. Bəziləri iftarını restoran və kafelərdə açmağa üstünlük verir, bəziləri isə dostlarına jest edərək iftar süfrələrinin məhz ictimai iaşə müəssisələrində təşkilinə çalışırlar.
Artıq paytaxtda və ətraf ərazilərdə fəaliyyət göstərən bir çox iaşə obyektləri xüsusi iftar menyularını təqdim etməyə başlayıblar. Menyularda şorba, xurma və sərinləşdirici içkilərdən tutmuş isti yeməklər, kabab növləri, plov, salatlar və şirniyyatlara qədər müxtəlif təamlar yer alır. Təklif olunan çeşidin zənginliyi isə qiymətlərdə fərqlilik yaradır.
Bəzi məkanlarda daha münasib paketlər təqdim olunsa da, mərkəzi ərazilərdə və yüksək xidmət səviyyəsi ilə seçilən restoranlarda qiymətlər xeyli dəyişir.
Bəs bu il restoranlarda iftar etmək istəyənlər nə qədər xərc çəkməli olacaqlar?
Əməkdaşımız müxtəlif ərazilərdə iftar menyularının qiymətlərini araşdırıb.
Ümumi qənaət belə oldu ki, paytaxtda fəaliyyət göstərən ictimai iaşə obyektlərində iftar menyusunun qiyməti bir nəfər üçün 25-90 manat arasında dəyişir.
Bəzi obyektlərdə iftarla yanaşı, imsak menyusu üçün açıq bufet də təşkil olunub. Bu zaman böyüklər üçün qiymət 18-20 manat təşkil edir. Yeddi yaşına qədər uşaqlar üçün ödəniş tələb olunmur, səkkiz yaşlı uşaqlara isə 50 faiz endirim tətbiq edilir.
Nərimanov rayonu ərazisində fəaliyyət göstərən restoranlarda iftar menyusunun qiyməti 25-50 manat aralığındadır. Təqdim olunan menyuya müxtəlif şorbalar, soyuq qəlyanaltılar, meyvə şirələri, çay və desertlər daxildir.
Səbail rayonunda isə qiymətlər 25-35 manat arasında dəyişir. Qiymət fərqi, əsasən, təqdim olunan əsas yeməyin toyuq, mal və ya balıq ətindən hazırlanmasından asılıdır. Müştərilərə bir neçə növ qəlyanaltı, salat, isti yemək, desert və içki təqdim olunur. İçkilər sırasında qazsız su, kompot və çay yer alır, desert olaraq isə xurma və günə uyğun şirniyyat verilir.
Nizami küçəsi ərazisində iftar menyusunun qiyməti 25-30 manat arasında dəyişir. Menyuda müxtəlif növ şorbalar, salatlar, isti yeməklər, ayran, kompot, su və türk paxlavası təqdim olunur.
Sumqayıt şəhərində isə qiymətlər 29-35 manat aralığındadır. Bu məbləğə üç çeşid şorba, soyuq məzələr, iki növ əsas yemək, meyvə suyu, ayran və şirniyyat olaraq xurma daxildir.
Bayıl qəsəbəsində fəaliyyət göstərən restoranlarda isə qiymətlər 30-90 manat arasında dəyişir.
Dilarə Əliyeva küçəsində yerləşən bəzi obyektlərdə iftar menyusunun qiyməti 10-25 manat arasında təklif olunur. Menyuya toyuq və ya ətlə hazırlanan isti yeməklər, şorbalar, müxtəlif salatlar (çoban, manqal, paytaxt), kələm turşusu, reyhan kompotu, ayran və çay daxildir.
Qeyd edək ki, göstərilən qiymətlər bir nəfər üçün nəzərdə tutulub və hər kəs təklif olunan növlərdən birini seçə bilər./oxu.az
