İranla ABŞ və İsrail arasında davam edən qarşıdurma yeni mərhələyə keçib. Körfəz ölkələri cümə axşamı enerji obyektlərinə pilotsuz uçuş aparatları (PUA) ilə hücumların edildiyini açıqlayıb. Bu hücumlar bir gün əvvəl İsrailin İranın “Cənub Pars” qaz yatağına zərbə endirməsindən sonra baş verib və regionda müharibənin daha da genişlənməsi riskini artırıb.
Məlumata görə, Səudiyyə Ərəbistanının Qırmızı dəniz sahilində yerləşən Yanbu limanındakı ən böyük neft emalı zavodlarından biri – SAMREF PUA hücumuna məruz qalıb. Neft sənayesindəki mənbə “Reuters” agentliyinə bildirib ki, hücum nəticəsində ciddi ziyan qeydə alınmayıb.
Qeyd edək ki, “Saudi Aramco” və “ExxonMobil” şirkətlərinə məxsus olan bu zavod gündə təxminən 400 min barrel neft emal edir və ölkənin əsas ixracyönümlü müəssisələrindən biridir.
Küveytdə isə “Kuwait Petroleum Corporation” şirkəti bildirib ki, Mina əl-Əhmədi neft emalı zavodunun istismar bloklarından birinə PUA zərbəsi endirilib. Hadisə nəticəsində kiçik yanğın baş verib.
Eyni zamanda, Böyük Britaniyanın Dəniz Ticarət Əməliyyatları Agentliyi (UKMTO) Qətərin əsas sənaye mərkəzi olan Ras Laffan yaxınlığında bir gəminin mərmi zərbəsinə məruz qaldığını açıqlayıb. Qətər rəsmiləri daha əvvəl bildirmişdi ki, sənaye zonası İrandan buraxılan ballistik raketlərlə vurulub, nəticədə zədələnmə və yanğın baş verib. Daha sonra ölkənin Daxili İşlər Nazirliyi bütün yanğınların nəzarətə götürüldüyünü açıqlayıb.
İranın İnqilab Keşikçiləri Korpusu isə bir gün əvvəl BƏƏ, Qətər və Səudiyyə Ərəbistanında yerləşən bir sıra neft obyektlərinin, o cümlədən SAMREF zavodunun boşaldılması barədə xəbərdarlıq edib. Həmin günün axşamı İran Ras Laffan sənaye zonasına ilk raket zərbəsini endirib. Bu ərazidə Qətərin əsas enerji şirkəti olan “QatarEnergy”-nin strateji obyektləri yerləşir.
Səudiyyə Ərəbistanı isə Tehrana çağırış edərək hücumları dayandırmağı tələb edib. Ölkənin xarici işlər naziri Feysəl bin Fərhan Ər-Riyadda ərəb və müsəlman ölkələrinin XİN rəhbərləri ilə görüşdən sonra bildirib ki, İranın qonşu dövlətlərə hücumları nəticəsiz qalmayacaq.
Xatırladaq ki, fevralın 28-dən ABŞ və İsrailin İrana qarşı başladığı hərbi əməliyyatlardan sonra İran dəfələrlə Səudiyyə Ərəbistanı və digər Körfəz ölkələrinə raket və PUA hücumları həyata keçirib. Bu hücumların hədəfində yaşayış məntəqələri, enerji infrastrukturu, hava limanları və diplomatik obyektlərin olduğu bildirilir. /azpolitika.info
