ABŞ Prezidenti Donald Tramp Vaşinqtonun İranın neft sənayesinə nəzarəti ələ keçirməsini istəyir.
Ağ Ev lideri bu barədə “Financial Times” qəzetinə müsahibəsində bildirib.
O, İran haqqında danışarkən qeyd edib ki, burada nefti ələ keçirməyə üstünlük verərdi:
“Düzünü desəm, ən çox İrandan nefti götürmək xoşuma gələrdi, amma ABŞ-dəki bəzi axmaq insanlar deyirlər ki, niyə belə edirsiniz? Amma onlar axmaq insanlardır”.
Tramp həmçinin martın 26-da öz kabinetinin iclasında qeyd etmişdi ki, ABŞ tərəfindən İran neftinə nəzarətin ələ keçirilməsi, onun fikrincə, mümkün addımlardan biridir.
“Bu, variantdır”, – deyə o, həmin gün bildirmişdi.
ABŞ lideri habelə İrandan zənginləşdirilmiş uran ehtiyatlarının çıxarılması üçün hərbi əməliyyatın keçirilməsi ehtimalını da nəzərdən keçirir. Belə bir iddia ilə “The Wall Street Journal” qəzeti çıxış edib.
Nəşrin məlumatına görə, riskli və mürəkkəb bir missiya olacaq bu əməliyyat reallaşacağı halda, ABŞ quru qoşunlarının bir neçə gün ərzində ölkəyə müdaxiləsini nəzərdə tutacaq.
Qəzet bildirir ki, Tramp ümumilikdə belə bir əməliyyatın keçirilməsi ideyasına açıqdır, lakin ABŞ qoşunlarının məruz qalacağı təhlükələrin səviyyəsini qiymətləndirir. ABŞ lideri hələlik yekun qərar verməyib.
Bundan əlavə, nəşrin yazdığına görə, Donald Tramp müşavirlərinə göstəriş verib ki, münaqişəyə son qoyulması şərtlərindən biri olaraq İrana təxminən 1 000 funt (təxminən 450 kq) zənginləşdirilmiş uranı könüllü olaraq təhvil verməsi üçün təzyiq edilsin.
