Türkiyənin xarici işlər naziri Hakan Fidan İsrailin Baş naziri Benjamin Netanyahu hökumətinin Türkiyəyə qarşı yeni siyasi xətt formalaşdırmağa çalışdığını bildirib. O qeyd edib ki, İsrail “düşmənsiz yaşaya bilməz” və bu səbəbdən Türkiyəni yeni düşmən kimi təqdim etmək istiqamətində addımlar atır.
Nazir bu fikirləri Anadolu Agentliyinin (AA) “Redaksiya Masası” proqramında səsləndirib.
ABŞ–İran danışıqları və Türkiyənin rolu
Hakan Fidan bildirib ki, ABŞ və İran arasında Pakistanın paytaxtı Islamabad şəhərində keçirilən danışıqlar diqqətlə izlənilir. Onun sözlərinə görə, Türkiyə tərəflərlə daim təmasdadır və prosesin harada tıxandığını müəyyənləşdirməyə çalışır.
Fidan qeyd edib ki, ABŞ-ın vitse-prezidenti Cey Di Vens danışıqlardan sonra keçirilən mətbuat konfransında müəyyən təkliflərin masaya qoyulduğunu, lakin nüvə məsələsində hələ də ciddi fikir ayrılıqlarının olduğunu açıqlayıb.
Nazirin sözlərinə görə, tərəflərin ilkin mövqelərinin maksimalist olması normaldır və vasitəçilərin iştirakı ilə ortaq nöqtəyə gəlmək mümkündür: “Əsas odur ki, tərəflərdə atəşkəsə nail olmaq və onu davam etdirmək üçün real siyasi iradə olsun. Hazırda hər iki tərəf bu ehtiyacın fərqindədir.”
“İsrail amili həmişə nəzərə alınmalıdır”
Fidan vurğulayıb ki, regionda baş verən proseslərdə İsrail faktoru daim “oyun pozan” rol oynayır: “Biz bunu həm amerikalılara, həm də digər tərəflərə açıq şəkildə deyirik. İsrailin bu proseslərdə necə davranacağını hər zaman hesablamalıyıq.”
O əlavə edib ki, İran tərəfi ABŞ-ın təkliflərini nəzərdən keçirir və yaxın zamanda cavab verə bilər.
Nazir İsrailin Suriyaya hücumlarının Türkiyə üçün ciddi təhlükə yaratdığını bildirib: “Suriya böyük risk zonasına çevrilir. İsrail təhlükəsizlik adı altında ekspansionist siyasət yürüdür.”
Onun sözlərinə görə, İsrail hazırda İranla bağlı vəziyyətə görə bəzi addımları atmır, lakin bu, gələcəkdə belə addımların olmayacağı anlamına gəlmir.
Hakan Fidan bildirib ki, Türkiyə Yaxın Şərqdə gərginliyin azaldılması üçün aktiv diplomatik fəaliyyət göstərir. O, region ölkələri arasında qarşılıqlı təhlükəsizlik zəmanətləri əsasında yeni mexanizmlərin yaradılmasının vacibliyini vurğulayıb.
“İsrail Türkiyəni yeni düşmən kimi təqdim etmək istəyir”
Nazir İsrailin Türkiyəyə qarşı ritorikasının həm siyasi, həm də strateji səbəblərlə bağlı olduğunu qeyd edib. Onun sözlərinə görə, Türkiyənin regional siyasətdə balanslaşdırıcı rolu və beynəlxalq nüfuzu İsraildə narahatlıq yaradır.
Fidan bildirib: “İsrail siyasi elitası Türkiyəni istədiyi kimi zəiflədə bilmir. Bu da onları müəyyən dərəcədə qeyri-sabit davranışlara sövq edir.”
O əlavə edib ki, İsrail daxilində bəzi siyasi dairələr Türkiyəni yeni düşmən kimi təqdim etməyə çalışır: “İrandan sonra İsrail düşmənsiz qala bilməz. Bu səbəbdən Türkiyəni yeni düşmən kimi göstərmək cəhdləri var. Bu, əvvəlcə daxili siyasətdə istifadə olunur, sonra isə dövlət strategiyasına çevrilməyə çalışılır.”
Nazir həmçinin bildirib ki, Türkiyədə keçiriləcək NATO zirvəsi alyans tarixinin ən mühüm toplantılarından biri ola bilər. Onun sözlərinə görə, ABŞ-ın keçmiş prezidenti Donald Tramp da Ankarada keçiriləcək zirvəyə dəvət olunub. /azpolitika.info
