Azərbaycanın keçmiş xarici işlər naziri Tofiq Zülfüqarov Ermənistanın siyasi elitasında son illər müşahidə olunan ritorika dəyişikliklərini şərh edib. O bildirib ki, vaxtilə beynəlxalq sənədlərdə ərazi bütövlüyü prinsipinə qarşı çıxan İrəvan indi tamamilə fərqli mövqe nümayiş etdirir.
T.Zülfüqarov qeyd edib ki, 1990-cı illərdə Ermənistan nümayəndələri müzakirə olunan sənədlərdə ərazi bütövlüyü prinsipinin yer almasını sistemli şəkildə bloklayırdılar. Onun sözlərinə görə, bunun ən bariz nümunəsi Alma-Ata Bəyannaməsi olub: “Hətta həmin sənəd parlament səviyyəsində bu günə qədər faktiki olaraq tanınmayıb”.
Keçmiş nazir vurğulayıb ki, hazırda isə Ermənistan rəhbərliyi, Nikol Pashinyan və onun komandası hər fürsətdə ərazi bütövlüyü prinsipini ön plana çəkir: “Onlar indi keçmişdə özlərinin tanımadığı “Ermənistan SSR sərhədlərinin” qəbul etdirilməsinə çalışırlar”.
Tofiq Zülfüqarovun fikrincə, bu ziddiyyətli yanaşma Ermənistan daxilində siyasi manipulyasiyaların göstəricisidir. O, Paşinyanın simvolik addımlarını da tənqid edərək qeyd edib ki, Baş nazirin geyimində istifadə etdiyi bəzi nişanlar “reallıqdan uzaq siyasi mesajlar” daşıyır.
Eks-nazir əlavə edib ki, regionda əvvəlki illərin siyasi fiqurları da yenidən fəallaşmağa başlayıb. Onun sözlərinə görə, Robert Koçaryan və Serj Sarqsyan kimi şəxslər əvvəlki ritorikanı gündəmdə saxlamağa çalışırlar: “Onlar yaxşı anlayırlar ki, nə qüvvələr balansını dəyişmək, nə də Qarabağı geri qaytarmaq mümkündür. Amma müəyyən mərkəzlərin təsiri ilə köhnə narrativləri siyasi leksikonda saxlamağa cəhd edirlər”.
Keçmiş nazir sonda vurğulayıb ki, Ermənistanın ritorikasındakı dəyişikliklər real siyasətdə köklü transformasiya demək deyil və regionda proseslər hələ də həssas olaraq qalır. /azpolitika.info
