“Sülh müqaviləsinin mətni razılaşdırılıb, Ermənistan iki bənd üzrə Azərbaycanın təklif etdiyi variantları qəbul edib. Bunlar sülh müqaviləsinin əsas məqamlarıdır: sərhəddə üçüncü qüvvələrin, yəni Avropa İttifaqı missiyasının mümkünsüzlüyü və beynəlxalq məhkəmələrdəki iddiaların qarşılıqlı geri götürülməsi. Bütün bunlar ötən ildən qalıb və onlara sərf olunan enerji zaman itkisidir. Bu müddət ərzində o qədər variantlar istifadə olundu və zəhlətökən məzmun yaradıldı ki, bu nailiyyət sülh müqaviləsinin mətnində şok effekt vermədi”.
Bunları politoloq Fərhad Məmmədov Ermənistanla Azərbaycan arasında sülh layihəsi layihəsinin tam olaraq razılaşdırılmasını şərh edərkən bildirib.
Ekspert vurğulayıb ki, demək olar ki, Azərbaycanın hələ 2022-ci ildə irəli sürdüyü sülh müqaviləsi ideyası reallaşıb: “Razılaşdırılan iki maddə “2+2” düsturundan çıxıb və onu müşayiət edən iki proses qalıb: ATƏT-in Minsk Qrupunun buraxılması və Ermənistan Konstitusiyasına düzəliş. İndi diqqəti ATƏT-in Minsk Qrupunun buraxılması üzərində cəmləşdirməyin vaxtıdır – bu, xarici işlər nazirliklərinin işidir, ona görə də diplomatların hələ birlikdə görəcəkləri işlər var”.
Ermənistan Konstitusiyasını dəyişdirilməsinə gəlincə, F.Məmmədov xatırladıb ki, Paşinyan yalnız referendum elan edib: “Nə düzəliş layihəsi var, nə tarix müəyyən edilib, nə də Konstitusiya Məhkəməsinin qərarına əsasən, Ermənistan Konstitusiyasının dəyişməz hissəsi olan Preambulanın Ermənistan tərəfindən ləğv ediləcəyinə dair heç bir aydınlıq yoxdur”.
Politoloqun sözlərinə görə, belə qənaətə gəlmək olar ki, sülh prosesi dinamik xarakter daşıyır və hələ də münaqişə mənbəyi olan mühüm proseslər qalır və onların aradan qaldırılması lazımdır: “Prezident İlham Əliyevin bu gün qeyd etdiyi kimi, Ermənistan rəhbərliyinin 2020-ci ilin noyabrından 2023-cü ilin sentyabrına qədər sağlam düşüncəyə qarşı çıxması etimadı məhv edib.
İndi sülh prosesində çox vacib bir dövrdür, sülh müqaviləsinin mətni razılaşdırıldıqdan sonra biz onu müşayiət edən prosesləri həyata keçirməyə başlayacağıq”.
Fərhad Məmmədov deyir ki, Bakıdakı məhkəmə prosesi sülh prosesinin mühüm hissəsidir və Ermənistana cinayətkarların tapılması və məsuliyyətə cəlb edilməsində əməkdaşlıq təklif olunur.
“Beləliklə, yavaş-yavaş, lakin əminliklə, proses sürətini itirmir və davam edir”, – o, vurğulayıb.
