ABŞ Prezidenti Donald Tramp demək olar, işğalçılıq müharibəsi aparan Rusiya istisna olmaqla bütün dünyaya elan etdiyi və dünya iqtisadiyyatı, eləcə də ABŞ-nin özü çünü üçün ciddi mənfi fəsadlar yaratmağa başlayan “ticarət savaşı”na haqq qazandırmağa çalışıb.
Tramp getdikcə artan narazılıqları səngitmək üçün ABŞ-nin guya artıq yeni tariflərdən külli miqdarda gəlir əldə etdiyini iddia edib.
O deyib ki, ABŞ tariflərin kəskin yüksəldilməsi sayəsində gündə 2 milyard dollar qazanır: “Tariflər haqqında bilmək istəyənlər üçün isə deyim ki, tariflərdən gündə təxminən 2 milyard dollar qazanırıq, 2 milyard dollar! Və bizdə hər şey çox yaxşıdır. Amerika yenidən çox zəngin olacaq”.
ABŞ Prezidenti həmçinin bildirib ki, Yaponiya və Cənubi Koreya artıq ticarət sövdələşmələri üzrə danışıqlar aparmaq və onun administrasiyası tərəfindən tətbiq edilən yeni tariflərdən yayınmaq üçün öz nümayəndələrini Vaşinqtona göndərirlər. Eyni zamanda, “Reuters” qeyd edir ki, ABŞ Maliyyə Nazirliyinin rəsmi məlumatları Trampın elan etdiyi rəqəmləri qətiyyən təsdiqləmir. Əksinə, ABŞ-nin gömrük gəlirlərinin kəskin azaldığını, büdcənin ciddi ziyan gördüyünü ortaya qoyur.
Belə ki, ABŞ Xəzinədarlığının gündəlik maliyyə hesabatlarına görə, “gömrük və aksiz vergiləri” kimi təsnif edilən daxilolmalar aprel ayında gündə təxminən 200 milyon dollar təşkil edib. Hansı ki, tariflərdən əvvəlki fevral ayında ABŞ hökuməti təxminən 7,25 milyard dollar gömrük rüsumları toplayıb. Həmçinin Qərb mətbuatının da yazdığı kimi, tariflərin yüksəldilməsi zamanı ciddi hesablama səhvlərinə yol verilib.
Onu da əlavə edək ki, Trampın bu “dahiyanə iqtisadi gedişi” nəticəsində ABŞ-nin böyük sayda vətəndaşlarının çalışdığı iri şirkətlər ümumilikdə trilyonlarla dollar ziyan görüb, fond indeksləri çöküb. Əksər iqtisadçılar bunun nəticə olaraq, ABŞ də daxil olmaqla bütün dünya iqtisadiyyatını böhran, resesiya gözlədiyini proqnozlaşdırırlar.
