Qarabağ Universitetində Türk Dünyası Elm Mərkəzinin yaradılması təklif edilib.
Bu təkliflə Sosial Tədqiqatlar Mərkəzinin İdarə Heyətinin sədri Zahid Oruc Bakıda keçirilən Türk Dövlətləri Təşkilatına üzv ölkələrin sosioloji tədqiqat nəticələrinin təqdimatına həsr edilən beynəlxalq konfransda çıxış edib.
O qeyd edib ki, Qafqazın Konservatoriyası hesab olunan məkanda Türk Dünyası Ali Musiqi Məktəbi də inşa oluna bilər.
Deputat onu da bildirib ki, Xankəndində qədim və müasir türk dövlətlərinin bayraqları asıla bilər.
Z.Orucun sözlərinə görə, müasir dövrdə elm və təhsil sahəsində əməkdaşlığın elmi-sosioloji tədqiqatlarla müəyyən olunması türk dövlətləri arasında münasibətlərin inkişafı baxımından mühüm əhəmiyyət kəsb edir:
“Millətlərarası və regional ictimai fikrin öyrənilməsi, müqayisəli təhlillərin aparılması siyasi elitalarımız, akademik çevrələrimiz və beyin mərkəzlərimiz üçün xüsusi önəm daşıyır. Türk Akademiyasının “Türk Barometri” layihəsi tarixi bir missiyanı – Azərbaycan, Türkiyə, Qazaxıstan, Qırğızıstan və Özbəkistanı, bir sözlə türk coğrafiyasını elmi baxımdan hərtərəfli araşdıraraq və strateji məqsədlər naminə dərindən öyrənərək, gələcəyin yol xəritəsini hazırlayır”.
