“Əgər sülh planımıza müsbət cavab almasaq, ABŞ vasitəçilikdən imtina edəcək”.
Bunu ABŞ vitse-prezidenti J.D Vens bildirib.
O, qeyd edib ki, Tramp administrasiyası həm Ukraynaya, həm də Rusiyaya “aydın və ədalətli” təkliflər irəli sürüb.
“Ukrayna və Rusiya yeni münaqişə xətləri çəkəcək. Bu isə hər iki tərəfin hazırda nəzarət etdiyi bəzi ərazilərdən imtina etməsi anlamına gəlir”, – Vens qeyd edib.
O, ABŞ-nin Rusiya və Ukraynaya sülh sazişi istiqamətində irəliləmək üçün “çox aydın təklif” verdiyini vurğulayıb və əlavə edib: “İndi onlar ya ‘bəli’ deməlidirlər, ya da ABŞ bu prosesdən çəkilməlidir”.
Vens qeyd edib ki, sülhə nail olmaq üçün “bəzi ərazi dəyişiklikləri” qaçılmazdır və bu yeni sərhəd, ehtimal ki, hazırkı cəbhə xətti ola bilər.
“Səbəbsiz qan tökülməsini dayandırmaq üçün hər iki tərəf silahları yerə qoymalı, vəziyyəti dondurmalı və daha yaxşı bir Rusiya və Ukrayna qurmağa başlamalıdır,” – deyə o əlavə edib.
