Xəbər verdiyimiz kimi, mayın 7-11-i İsrail Baş naziri Binyamin Netanyahu, 10-da isə Türkiyə Prezidenti Rəcəb Tayyib Ərdoğanın Bakıya səfəri nəzərdə tutulub. Az öncə İran Prezidenti Məsud Pezeşkiyanın, ardınca dünya siyasətində önəmli rolu olan iki dövlət başçısının eyni vaxtda Bakıya səfər etməsi xeyli maraq doğurub.
Xüsusən də gözlənilən səfər zamanı Ərdoğan və Netanyahunun görüşəcəyi barədə fikirlər geniş müzakirələrə səbəb olub.
Mövzu ilə bağlı danışan sabiq xarici işlər naziri Tofiq Zülfüqarov onların görüşünün istisna olmadığını bildirib.
“Amma hesab edirəm ki, digər bir mövzu da yaddan çıxmamalıdır. Ola bilsin ki, cənab Prezident İlham Əliyev və Netanyahu Moskvada 9 May Paradında bir yerdə iştirak edəcəklər. Yəni Azərbaycandan getmələri də mümkündür. Gedib iştirak edib, geri qayıdıb səfəri davam etdirə bilərlər.
Hadisələr üst-üstdə düşür. İstisna olunmur ki, geniş müzakirələr olacaq. İsrail üçün Türkiyənin mövqeyi çox vacibdir. Ələlxüsus ona görə ki, artıq İsrail və İran arasında ciddi toqquşma ehtimalı çox yüksəkdir və bu vəziyyətdə Türkiyənin mövqeyi olduqca vacibdir. Ona görə İsrail istər-istəməz Türkiyə ilə bu və ya digər şəkildə məsələləri həll etməlidir”, – deyə sabiq nazir bildirib.
T.Zülfüqarovun sözlərinə görə, Türkiyə hərbi hava qüvvələrinin Suriyada yerləşən bəzi obyektlərdən istifadə etməsi İsraili narahat edir:
“Ümumiyyətlə, mövzular çoxdur. Yaxın Şərqdə baş verən hadisələr çox aktualdır. Bu mövzulara aid Rusiyanın da mövqeyi çox vacibdir. Hələ Rusiyanın Suriyada olan bazalarının aqibəti də müəyyən olunmayıb. Burada Türkiyənin də mövqeyi çox vacibdir.
Eyni zamanda bəzi mənbələr deyirlər ki, İsrail bu məsələdə fərqli bir mövqedədir. Guya ki, Rusiyanın Suriyada bazalarının qalmasının tərəfdarıdır. Ona görə 9 May təkcə parad eyil, bu mövzuların müzakirə yeri də ola bilər.
Digər tərəfdən bilirik ki, 9 May mövzusu indi gündəmdədir, ancaq onun keçirilməsi də sual altındadır. Rusiyanın təklifi var ki, 3 günlük atəşkəs elan olunsun. Amma Ukrayna bu təklifi qəbul etmir, deyir ki, atəşkəs 1 aylıq olsun.
Görünür ki, Azərbaycanın, cənab Prezidentin bu hadisələrdə aktiv iştirakı var və diqqət Bakıda cəmləşib. Ona görə də Netanyahunun və ya nümayəndələrinin təmasları Bakıda baş tutacaq”.
Sabiq nazir qeyd edib ki, İsrail-Azərbaycan danışıqlarına gəlincə, Pezeşkianın Azərbaycana səfəri unudulmamalıdır:
“Ola bilsin ki, İsrail Azərbaycanın hansısa müzakirələri onunla bölüşməsi ilə maraqlanır. Biz görürük ki, Pezeşkianın Azərbaycana səfəri çox səmimi oldu. Hiss olunurdu ki, o, Prezident İlham Əliyevə etibar edir. Eyni zamanda Azərbaycanın İsraillə münasibətləri də çox yüksək səviyyədədir.
Bu baxımdan Azərbaycanın təkcə Türkiyə ilə yox, İranla bağlı məsələlərdə də kommunikasiya kanalı kimi rolu istisna olunmur. Yəni biz görürük ki, artıq Bakı Prezident İlham Əliyevin aktiv siyasəti nəticəsində bir çox tərəflərin etibar etdiyi paytaxta çevrilib”./bakupost.az
