“Onlar (ukraynalılar – red.) quruda, suda və səmada 30 gün müddətinə hərtərəfli atəşkəsin zəruriliyi ilə razılaşıblar və bu müddət uzadıla da bilər. Onlar bunu bu gün istəyirlər”.
O qeyd edib ki, Ukrayna ABŞ-nin təklif etdiyi atəşkəsə razılaşıb. Həmçinin, Avropadakı tərəfdaşlar da buna razıdırlar. Lakin hazırda atəşkəs üçün “əsas maneə” Vladimir Putindir.
Kelloq etiraf edib ki, Ukrayna üçün heç də atəşkəslə bağlı bütün şərtlər məqbul deyil, “lakin biz getməli olduğumuz yolun bu olduğu qənaətinə gəlirik”.
Trampın xüsusi nümayəndəsi hesab edir ki, tərəflər əslində, mümkün atəşkəsə yaxındır: “Düşünürəm ki, biz yaxınıq. Nəticə verə biləcək yeganə şəxs Prezident Trampdır. Amma Putin razılaşarsa. Məncə, hazırda tərəqqiyə mane olan Rusiya Prezidentidir, o razı deyil”.
Kelloq daha əvvəl ABŞ-nin həm Ukrayna, həm də Rusiya tərəfindən idarə olunacaq 30 kilometrlik hərbisizləşdirilmiş zona yaratmaq ideyasını irəli sürdüyünü bildirmişdi. O, iddia edir ki, Kiyev hazırkı cəbhə xəttinə əsaslanaraq münaqişənin dondurulmasını müzakirə etməyə hazırdır.
Qeyd edək ki, bundan öncə istər Tramp özü, istərsə də onun yaxın ətrafı tez-tez Putinin ünvanına təriflər yağdırıb, Ukrayna rəhbərliyini “tərslikdə” ittiham edirdi…
