Türkiyə Silahlı Qüvvələrinin (TSK) İraqın şimalında həyata keçirdiyi Pençe-Kilit əməliyyatı bölgəsində baş verən metan qazı zəhərlənməsi ölkəni yasa boğub. 12 əsgərin şəhid, 7 əsgərin isə yaralanması ilə nəticələnən faciə ilə bağlı Müdafiə Nazirliyi dərhal araşdırma başladıb.
Mənbələrdən əldə edilən məlumata görə, hadisə 6 iyul 2025-ci ildə Avaşin bölgəsində, 852 metr yüksəklikdə yerləşən və vaxtilə terrorçular tərəfindən xəstəxana kimi istifadə edilmiş mağarada baş verib. Həmin mağarada şəhid Piyada Baş Leytenant Nuri Melih Bozkurtun cəsədinin ola biləcəyi ehtimalı ilə axtarış işləri aparılıb.
Əvvəllər təmizlənmiş və təhlükəsiz elan olunmuş mağaraya daxil olan əsgərlər gözlənilmədən metan qazına məruz qalıblar. Zəhərlənmə nəticəsində çavuş Abdurrahman Akdoğan saat 09:58-də şəhid olub. Cəmi 2 dəqiqə sonra, leytenant Ege Akar da həyatını itirib. Ard-arda gələn acı xəbərlərlə şəhid sayı 12-yə çatıb.
Zəhərlənmə xəbərindən sonra bölgəyə dərhal AFAD, TSK və mədən mütəxəssislərindən ibarət xüsusi təchizatlı komanda göndərilib. Yaralı əsgərlər xəstəxanaya çatdırılsa da, 12 nəfərin həyatını xilas etmək mümkün olmayıb.
İlkin ekspertiza nəticələrinə əsasən, heç bir səhlənkarlıq və ya qəsd izinə rast gəlinməyib. Eyni zamanda bildirilib ki, bu hadisənin “Terrordan Azad Türkiyə” prosesinə qarşı planlaşdırılmış sabotaj olması ehtimalı da yoxdur.
Şəhid olan əsgərlərin adları
Baş Çavuş Abdurrahman Akdoğan
Leytenant Ege Akar
Müqaviləli Piyada Mahsun Yeşildemir
Müqaviləli Piyada Özkan Özkanlı
Müqaviləli Piyada Əhməd Kuşak
İstehkam Leytenantı Ege Akar
Piyada Leytenant Furkan Sert
Baş Qərargah Baş Çavuş Fikrət Manqurə
Qərargah Çavuşu Enver Yaman
Qərargah Çavuşu Kani Obi
Müqaviləli Əsgər Celalettin Uyanık
Müqaviləli Əsgər Əhməd Gültekin
