Rusiya lideri Vladimir Putin ‘‘Tomahawk’’ raketlərinin Ukraynaya göndərilməsinin qarşısını almaq üçün Tramp administrasiyasına müxtəlif ritorik üsullarla təzyiq göstərir.
Müharibə Araşdırmaları İnstitutunun (ISW) yazdığına görə, onun narahat olmaq üçün ciddi səbəbləri var.
Putin bəyan edib ki, ABŞ-ın ‘‘Tomahawk’’ raketlərini Ukraynaya göndərməsi ‘‘ABŞ-Rusiya münasibətlərində yaranmağa başlayan müsbət tendensiyanın məhv olmasına gətirib çıxaracaq’’. Bundan əvvəl o, ABŞ hərbçilərinin guya Ukraynanın ‘‘Tomahawk’’ zərbələrində birbaşa iştirak edəcəyini söyləmiş, bu hücumların ‘‘eskalasiyanın yeni mərhələsi’’ olacağını, lakin cəbhədə vəziyyəti dəyişməyəcəyini iddia etmişdi.
“Putin görünür, müxtəlif yanaşmaları sınayır – ikitərəfli münasibətlərin pisləşməsi ilə hədələməkdən tutmuş raketlərin effektivliyini kiçiltməyə qədər – məqsəd isə ABŞ-ın qərarvermə prosesinə təsir göstərməkdir”, – deyə ISW hesabatında qeyd olunur. Analitiklərin fikrincə, Kreml ABŞ-ın Ukraynaya ‘‘Tomahawk’’ raketləri verməsinin qarşısını almağa çalışır, çünki bu raketlər Rusiyanın arxa cəbhəsindəki nisbətən təhlükəsiz zonaları artıq qoruyub saxlaya bilməzdi.
ISW-nin analitikləri bildirirlər ki, Ukrayna hazırda uzaqmənzilli pilotsuz uçuş aparatları vasitəsilə Rusiyanın arxa bölgələrinə zərbələr endirə bilir, lakin bu dronların daşıma qabiliyyəti məhduddur və xüsusi hərbi obyektləri məhv etmək üçün yetərli deyil. Əgər Ukrayna böyük döyüş başlığına malik raketlərlə Rusiyanın dərin arxa cəbhəsinə zərbələr endirə bilsə, bu, Moskvanın mühüm hərbi infrastrukturuna ciddi zərbə vurar və bəzi obyektləri tamamilə sıradan çıxara bilər. Məsələn, Tatarıstanın Yelabuga şəhərindəki ‘‘Şahed’’ dron zavodu və Saratov vilayətindəki ‘‘Enqels-2’’ aviabazası kimi obyektlər bu kateqoriyaya daxildir.
ISW-nin qiymətləndirməsinə görə, 2500 kilometr məsafəyə uçan ‘‘Tomahawk’’ raketlərinin radiusu daxilində azı 1945 Rusiya hərbi obyekti, 1600 kilometrlik versiyasının isə 1655 obyekti yerləşir. Hesabatda vurğulanır ki, bu raketlər Ukraynaya Rusiya ordusunun cəbhə xəttindəki döyüş qabiliyyətini ciddi şəkildə zəiflətmək imkanı verərdi, çünki Ukrayna logistik dəstək və təminatla məşğul olan arxa zonalara zərbə endirə bilərdi.
Eyni zamanda, ISW xatırladır ki, Ukrayna artıq 3000 kilometr uçuş məsafəsinə və 1150 kiloqramlıq döyüş başlığına malik öz qanadlı raketi — FP-5 “Flaminqo”nun kütləvi istehsalına başlayıb. Lakin bu sistem hələ sınaqdan keçirilməyib və istehsalın genişlənməsi üçün zamana ehtiyac var.
Qeyd edək ki, ABŞ Ukraynaya ‘‘Tomahawk’’ qanadlı raketlərinin verilməsi imkanını nəzərdən keçirir. Bu barədə yekun qərarı ABŞ prezidenti Donald Tramp verməlidir.
Mediada yayılan məlumatlara görə, ‘‘Tomahawk’’ raketlərinin Ukraynaya ötürülməsi müharibənin gedişatını əhəmiyyətli dərəcədə dəyişə bilər./qaynarinfo.az
