Qəzzada atəşkəsin təmin edilməsi üçün səylər göstəriləcək.
Bunu ABŞ Prezidenti Donald Tramp bildirib.
Tramp bu fikri Kanada Baş naziri Mark Karni ilə Ağ Evdə keçirdiyi görüş zamanı jurnalistlərin suallarını cavablandırarkən səsləndirib.
ABŞ lideri qeyd edib ki, Qəzza ilə bağlı danışıqlar davam edir, bu məqsədlə Misirə bir heyət göndərilib və yaxın günlərdə yeni bir komanda da regiona yollanacaq.
“Qəzza məsələsində çox ciddi danışıqlar aparırıq. Mən inanıram ki, Yaxın Şərqdə sülh mümkündür. Region ölkələri və beynəlxalq ictimaiyyət bu prosesi dəstəkləyir”, – Tramp deyib.
Bir jurnalistin “Ərəb ölkələrinə, girovlar azad olunduqdan sonra İsrailin hücumlara yenidən başlamayacağına dair hansı təminatlar verirsiniz?” sualına cavab olaraq Tramp bildirib:“Əgər bu razılaşma baş tutarsa, hər kəsin ona əməl etməsi üçün əlimizdən gələni edəcəyik. Biz çox güclü mövqedəyik”.
ABŞ Prezidenti əlavə edib ki, mümkün atəşkəs təkcə Qəzzada deyil, bütövlükdə Yaxın Şərqdə sabitliyin möhkəmlənməsinə töhfə verəcək:“Gördüyüm qədərilə bu planı dəstəkləməyən ölkə yoxdur. Həqiqi mənada sülh üçün bir fürsət yaranıb”.
