Vladimir Putinlə telefon danışığından sonra Ukrayna Prezidenti Volodimir Zelenskini Ağ Evdə qəbul edən ABŞ Prezidenti Donald Trampın Ukrayna başçısı ilə söhbəti kifayət qədər gərgin alınıb.
İngiltərənin “Financial Times” qəzeti, Tramp ilə Zelenski arasında Ağ Evdə baş tutan görüşdəki söhbətin bəzi detallarını açıqlayıb.
Nəşrin Avropadakı diplomatik mənbələrə istinadla yaydığı məlumata görə, Tramp görüş zamanı əsəbiləşərək masadakı xəritələri stoldan atıb və nalayiq ifadələr işlədib, Zelenskiyə qarşı da aqressiv davranıb.
Mənbələrin bildirdiyinə görə, Zelenski görüşə Ukraynadakı cəbhə xəttini göstərən hərbi xəritələrlə gəlib.
Lakin Tramp sənədləri gördükdə onları masadan ataraq belə deyib: “Bu xəritəyə təkrar-təkrar baxmaqdan bezmişəm.”.
Tramp daha sonra əlavə edib ki, “bu qırmızı xəttin harada olduğunu bilmirəm, orada heç vaxt olmamışam”.
“Financial Times” yazır ki, Tramp bu zaman Putinin ritorikasına bənzər fikirlər səsləndirib və görüşün çox hissəsini məsləhət vermək tonunda keçirdib.
Nəşrin məlumatına əsasən, Tramp Putinin müharibəni təsvir etmək üçün istifadə etdiyi terminləri də təkrarlayıb və Zelenskiyə belə deyib:“Bu bir müharibə deyil, xüsusi əməliyyatdır. Əgər razılaşma əldə etməsən, ölkən məhv olacaq”.
Hətta Trampın Donbas bölgəsinin tamamilə Rusiyaya verilməsini təklif etdiyi də iddia olunur.
Nəşrin məlumatına görə, iki lider arasında dialoq dəfələrlə gərginləşib. Trampın tez-tez nalayiq ifadələr işlədib. Zelenskinin isə Putinə etibar etməyin mümkünsüzlüyünü vurğuladığı bildirilib.
Görüşdən sonra açıqlama verən Zelenski, Trampın sülh çağırışına ehtiyatla yanaşdığını bildirib.
“Reuters”-in məlumatına görə isə Donald Tramp Ağ Evdə Zelenski ilə danışıqlar zamanı təkcə Ukraynaya deyil, həm də Rusiyaya təhlükəsizlik zəmanətinin verilməsi ideyasını irəli sürüb.
“Tramp hər iki tərəf üçün təhlükəsizlik təminatlarından danışıb və bu, ukraynalıları çaşdırıb”, – agentliyin mənbələri bildirib.
“Reuters” də təsdiqləyir ki, danışıqlar zamanı Tramp Zelenskini müharibəni dayandırmaq üçün Rusiyaya ərazi güzəştinə getməyə çağırıb.
“Politico” nəşri isə yazır ki, ABŞ Prezidenti sonda ukraynalı həmkarına müharibənin hazırkı cəbhə xəttində dayandırılmasını təklif edib. Zelenski isə bundan öncə Ukraynanın Rusiyanın hələ işğal etmədiyi ərazilərdən imtina etməsi tələbi ilə razılaşmayıb. “Nəhayət, Tramp görüşü “Yaxşı, indiki cəbhə xəttində buna son qoymağa çalışaq” deyərək yekunlaşdırdı”, – mənbə bildirib.
Xatırladaq ki, Tramp və Putin yaxın iki həftə ərzində Budapeştdə növbəti təkbətək görüş keçirmək barədə razılığa gəliblər. Qərb mediası bu dəfə də Alyaska ssenarisinin təkrarlanmasından – Putinin vaxt udmasından və Trampı “barmağına dolamasaından” ehtiyat edirlər.
Eyni zamanda, iddia olunur ki, Putin Donbasın qalan hissəsinin Rusiyaya verilməsi müqabilində Ukraynaya Zaporojye və Xerson vilayətlərindəki bəzi kiçik əraziləri geri qaytarmağı təklif edib. Bu da bir növ guya Putinin öz mövqeyində güzəştə getməsi kimi təqdim olunur.
Lakin əksər analitiklər Donetskin qalan hissəsinin Rusiyaya döyüşüsüz təhvil verilməsini mümkünsüz sayır və qeyd edirlər ki, bunu Putin də yaxşı bilir. Buna baxmayaraq, Rusiya başçısının müxtəlif “güzəştlər” təklif edərək, bunun müqabilində həmin ərazini istəməsi, bir tərəfdən Trampda guya danışıqlara və sülhə meylli olması barədə təsəvvür yaratmaq, vaxt qazanmaq, digər tərəfdən isə müharibədən yorulmuş Ukrayna cəmiyyətində qarşıdurma və hakimiyyətdən narazılıq yaratmağa hesablanıb. /azpolitika.info
