“Prezident göstərişi ilə ölkəmizdə korrupsiyaya qarşı ciddi addımlar atılır. Baş Prokurorluq, Daxili İşlər Nazirliyi və Dövlət Təhlükəsizliyi Xidməti hazırda bu istiqamətdə ciddi tədbirlər görür. Hesab edirəm ki, xaricdən Azərbaycana qarşı çıxışlar edən, söyüşlər yağdıran blogerlərin maliyyələşdirilməsi məsələsi də zamanla müəyyən ediləcək”.
Bunu açıqlamasında Vəhdət Partiyası sədrinin müşaviri, professor Cümşüd Nuriyev son günlər ölkədə keçirilən əməliyyatlar və saxlanılan icra hakimiyyəti başçısı və əməkdaşları barədə danışarkən deyib.
Onun sözlərinə görə, Prezident Administarsiyasının sabiq rəhbəri Ramiz Mehdiyevlə bağlı çox məsələlər var və Zəfər paradından sonra bu işlər bir qədər də sürətlənə bilər.
“İki rayonun icra hakimiyyətində əməliyyat keçirilib, həbslər aparılıb. Ehtimal edirəm ki, bu proses davam edəcək. Mehdiyevə bağlı xeyli icra başçısı var. Hətta onların sayının on altı olduğu məlumdur. İndi ikisində iş aparılıb. Digər tərəfdən, Mehdiyevin bəzi ali təhsil ocağına da təsir imkanı mövcuddur. Məsələn, Təfəkkür Universitetində onun payı var. Mən bilmirəm bu pay kimin adına rəsmiləşdirilib, amma bu, mövcuddur. Universitetin də gözəl binası var, əgər satılsa, Mehdiyev buradan bir neçə milyon manat qazanacaq. Eyni zamanda ölkədə Mehdiyevə bağlı olan bir neçə qeyri-hökumət təşkilatı da var. Ən azından bu qurumlara sədrlik edənlər Mehdiyevə yaxın adamlardır. Sözsüz ki, Mehdiyevə yaxın şəxslər parlamentdə də təmsil olunurlar və onların danışması məni qətiyyən təəccübləndirməz”,- professor əlavə edib.
C. Nuriyev deyib ki, Mehdiyevin adamları, ona yaxın şəxslərlə bağlı media da araşdırma apara bilər:
“Araşdırın, görün Mehdiyevin köməkçiləri kimlər olub və hazırda hansı vəzifələri tuturlar”.
C. Nuriyevin iddiasına görə, xaricdə olan blogerlər diqqəti R. Mehdiyevdən yayındırmaq məqsədilə ortaya müxtəlif məsələləri atırlar.
Professor bildirib ki, ölkədə korrupsiya yüksək həddədir və bununla ciddi mübarizə aparılması alqışa layiqdir:
“Rəsmi statistikaya görə, ölkəmizdə korrupsiya 12 faizdir. Amma mənim qənaətimcə, reallıqda bu rəqəmdən bir neçə dəfə çoxdur. İnanıram ki, buna qarşı tədbirlər davam edəcək. Bir neçə icra başçısı var ki, əmlakları milyardlarla hesablanır və bunlar büdcədən oğurlanan pullar hesabınadır. Eləcə də Kənd Təsərrüfatı Nazirliyi ən çox pul xərcləyən qurumdur. Qısası, Mehdiyevin harada barmağı varsa, ora ən çox oğurlayan strukturdur. Bunu da qəsdlə təşkil edib ki, Azərbaycanın korrupsiya içində boğulduğu görüntüsü yaransın”.
C. Nuriyev sonda qeyd edib ki, Azərbaycanın rəhbəri ölkəni korrupsiyadan xilas etməyə çalışır və görülən tədbirlər buna xidmət edir./reyting.az
