Donald Trampın Ukraynaya “Tomoqavk” raketləri verib-verməyəcəyi qərarı dünya gündəmində ən çox müzakirə olunan mövzulardan olsa da, ABŞ Prezidenti yenə də bununla bağlı qəti qərar verməkdən yayınır.
Xarici KİV xəbər verir ki, öz təyyarəsində jurnalistlərə açıqalnma verən ABŞ Prezidenti hələlik Ukraynaya uzun mənzilli “Tomaqavk” raketləri verməyi düşünmədiyini deyib.
Jurnalistlər Trampdan onun administrasiyasının Ukraynaya sözügedən raketləri verməyi düşünüb-düşünmədiyini soruşublar. Tramp cavabında “Xeyr, ən azından indi yox” deyib. Lakin o qeyd edib ki, “fikrini dəyişə bilər”, amma hələlik cavabı “xeyr”dir.
Ağ Ev rəhbəri həmçinin deyib ki, onun fikrində “Rusiya üçün son damla” deyilən bir şey yoxdur: “Son damla olmayacaq. Bəzən hər iki tərəfin döyüşməsinə icazə verməlisən. Və onlar döyüşürlər. Bu, Putin üçün çətin bir müharibədir. O, çoxlu əsgər itirib, bəlkə də bir milyon. Amma döyüşlər Ukrayna üçün də çətindir”.
Bundan əlavə, Amerika lideri dondurulmuş Rusiya aktivlərinin mümkün müsadirəsi ilə bağlı müzakirələrdə iştirak etmədiyini bildirib.
Qeyd edək ki, oktyabrın əvvəlində Ukrayna Prezidenti Volodimir Zelenski ilə görüş zamanı Tramp Kiyevə “Tomaqavk” raketləri verməməyi üstün tutduğunu deyib, çünki onlar ABŞ-nin özünü müdafiə etməsi üçün lazımdır. Lakin 31 oktyabrda CNN öz mənbələrinə istinadla bildirib ki, Pentaqon Amerikanın raket ehtiyatlarının kifayət edəcək qədər olduğunu qiymətləndirdikdən sonra bu raketlərin Kiyevə çatdırılmasının mümkünküyünü təsdiqləyib. Kanal raketlərin Ukraynaya verilməsi üçün yalnız ABŞ Prezidentinin siyasi qərarının lazım olduğunu bildirib. Pentaqonun belə bir nəticə ilə çıxış etməsi bir növ Trampın qəti qərar verməyə təhrik edilməsi kimi görünür. Bu da ABŞ administrasiyasında “Tomaqavk”-ların Ukraynaya verilməsi üçün Trampa təzyiqlər olduğunun göstəricisi hesab edilir.
Bu arada Rusiya təbliğat kanalları Trampın tərəddüdlərinə baxmayaraq, ABŞ-nin tez, ya gec Ukraynaya “Tomaqavk” raketlərini verəcəyini bildirirlər. Ukraynalı şərhçilərsə bu raketlərin döyüş meydanındakı vəziyyətə həlledici təsir göstərməsə də, Rusiyanın dərinliklərinə zərbələr endirmək üçün effektli olacağını qeyd edirlər. Lakin bunun üçün həm raketlərin, həm də onların buraxılış vasitələrinin sayının çox olmasəı lazımdır. /azpolitika.info
