İngiltərənin məşhur “The Economist” jurnalı “The World Ahead 2026” adlı xüsusi buraxılışında dünya düzənində baş verəcək böyük dəyişikliklər barədə xəbərdarlıq edib.
Jurnalın yeni buraxılışı həm gələcəklə bağlı proqnozları, həm də planetin hansı istiqamətə sürükləndiyini göstərən simvolları ilə diqqət çəkib.
Ekspertlərin fikrincə, 2026-cı il “sistemin yenidən yazılacağı” dönüş nöqtəsi ola bilər.
Jurnalın üz qabığının mərkəzindəki yırtıcı quş — güc, nəzarət və təhlükə balansını simvolizə edir. Jurnala görə bu, “dünyanı həm izləyən, həm də sınağa çəkən bir göz” mənasını daşıyır. Üz qabığında yer alan “Only 1,361 days to go” (“Cəmi 1 361 gün qalıb”) ifadəsi isə bəşəriyyət üçün geri sayım mesajıdır — “Vaxt hələ var, amma sürətlə tükənir.”
Üz qabığında diqqət çəkən 250 rəqəmi, ABŞ-nin yaranmasının 250 illiyi ilə bağlıdır.
Pastanın ətrafında Donald Tramp, Si Cin Pin, Vladimir Putin, Volodimir Zelenski və Benyamin Netanyahu kimi liderlərin təsviri var. Bu, 2026-nın böyük gərginlik ili olacağına işarə sayılır.
Pastanı əhatə edən tank, robot, peyvənd və mikroçip simvolları isə müharibə, texnologiya və sağlamlıq arasına sıxışmış bir dünyanı göstərir.
The Economist-ə görə, 2026-cı il BMT-nin 2030 Davamlı İnkişaf Məqsədləri baxımından həlledici olacaq.
Artan iqtisadi bərabərsizlik, iqlim böhranı və texnoloji uçurum bu məqsədləri təhdid edir.
ABŞ-ın 250 illiyi: birlik, yoxsa parçalanma?
2026 ABŞ üçün tarixi bir mərhələdir. Lakin Respublikaçılar və Demokratlar arasında dərin qütbləşmə ölkədəki “birlik” atmosferini zəiflədir. Jurnal sual edir: “Növbəti qlobal böhranda Amerikaya kim yardım edəcək?”
Tramp siyasəti: güc, yoxsa təcrid?
Donald Tramp “qeyri-müəyyənlik” siyasətini strateji üstünlük sayır. Ancaq “The Economist”-in analizinə görə, bu yanaşma ABŞ-ni qısamüddətli qazanclardan sonra beynəlxalq arenada təcrid edə bilər.
Yeni borc böhranı: “Zənginlərin yoxsulluq testi”
Jurnal xəbərdarlıq edir ki, 2026-cı ildə inkişaf etmiş ölkələrdə borc böhranı yenidən güclənə bilər.
Yüksək faiz dərəcələri, büdcə kəsirləri və artan dövlət xərcləri nəticəsində yeni iqtisadi dalğa yarana bilər.
Bu vəziyyət “zənginlərin yoxsulluq testi” kimi xarakterizə olunur.
Süni intellekt yüksəlir, amma risk də artır
Üz qabığında yer alan robotlar və mikroçiplər süni intellektin yüksəlişini təmsil edir.
2026-cı ilə qədər bu texnologiya siyasət və iqtisadiyyatda daha güclü rol oynayacaq.
Lakin ekspertlər xəbərdarlıq edir ki, işsizlik, etik problemlər və məlumat inhisarı kimi risklər də artacaq.
İqlim böhranı: “Ümid cənubdan gələ bilər”
Qlobal temperatur artıq 1,5°C həddinə yaxınlaşıb. “The Economist” yazır ki, şimal ölkələri yavaş irəliləyir, lakin Latın Amerikası, Afrika və Asiyada bərpa olunan enerji yatırımları artmaqdadır.
Bəlkə də iqlim böhranından “xilas yolu” cənub yarımkürəsindən gələcək.
Yeni güc üçbucağı: ABŞ–Çin–Rusiya
Dünya artıq ikiqütblü deyil. ABŞ və Çin rəqabəti dərinləşir, Rusiya isə öz təsir dairəsini genişləndirir.
Jurnal bu vəziyyəti “qeyri-müəyyənliyin yeni norması” adlandırır və qlobal ittifaqların yenidən formalaşacağını bildirir.
Avropanın üçlü imtahanı: təhlükəsizlik, iqtisadiyyat, populizm
Avropa 2026-da üç böyük təzyiqlə üzləşəcək: Rusiya təhlükəsi, iqtisadi durğunluq və radikal sağ qüvvələrin yüksəlişi. Bu, Avropa İttifaqı üçün “birlik, yoxsa dağılma?” sualını yenidən gündəmə gətirir.
Sağlamlıqda yeni dövr: gen terapiyası və arıqlama dərmanları
Üz qabığında peyvənd simvolları tibbdə dönüş dövrünü göstərir.
Yeni nəsil arıqlama dərmanları və gen müalicələri 2026-cı ildə milyonlarla insana çatacaq.
Lakin jurnal xəbərdarlıq edir: “Asan kilo itkisi etik və tibbi problemləri də gətirə bilər”.
2026 Dünya Kuboku – diplomatiya meydanı
2026-cı ildə ABŞ, Kanada və Meksika birgə Dünya Kubokuna ev sahibliyi edəcək.
“The Economist” bu tədbiri sadəcə futbol deyil, həm də qlobal diplomatiya arenası kimi dəyərləndirir.
“Zaman azalır, seçimlər daralır”
“The Economist” yazır: “2026 bir kehanət (proqnoz) deyil, bir xəbərdarlıqdır. Dünya yeni bir dövrə qədəm qoyur. 2030 məqsədlərinin taleyi 2026-da veriləcək qərarlardan asılı olacaq. Zaman azalır, seçimlər daralır. Gələcəyə hazır olun – çünki onu artıq təxirə salmaq mümkün deyil”. /azpolitika.info
