Kənd Təsərrüfatı Nazirliyinin Üzümçülük və Şərabçılıq Elmi Tədqiqat İnstitutu Kolleksiya bağının təmir bərpası və yeni bağın salınması üçün elmi tədqiqat xidmətləri üzrə 06.10.2025-ci ildə başladığı kotirovka sorğusuna yekun vurub. Müsabiqənin qalibi “İnam Grop 2024” Məhdud Məsuliyyətli Cəmiyyəti seçilib və tərəflər arasında 85.105,01 manat dəyərində satınalma müqaviləsinin bağlanılması planlaşdırılır. Məlumat satınalmaların portalında 12.11.2025-ci ildə dərc edilib.
Şərtlər toplusuna görə “İnam Grop 2024” MMC Üzümçülük və Şərabçılıq Elmi-Tədqiqat İnstitutunun elmi seleksiya işlərinin nəticəsi olan hibrid sortların, klon formaların və nadir yerli üzüm sortlarının artırılması məqsədi ilə tinglərin əkinqabağı peyinə basdırılması (Təmir üçün: Gəncə TS, Şamaxı TS, Abşeron YTT, cəmi 10 ha), çalanın qazılması (Təmir üçün: Gəncə TS, Şamaxı TS, Abşeron YTT, cəmi 10 ha), metal payacıqların basdırılması və zoğların ona bağlanması, paslanmayan metaldan payacıqlar (diametri 10-12 mm-lik)- tinglərin dibinə basdırmaq və tənəyin gövdəsinin (ştambının) düz formalaşması üçün, hasarın çəkilməsi üçün dəmir torun alınması və bağlanması-hündürlüyü 150 sm, məftil qalınlığı 2,5 mm, torun gözü 5 sm, paslanmayan, sinklənmiş məftildən (Gəncə TS üçün), tinglərin suvarılması, bərpa üçün Bayanşirə, Ağ Aldərə, Mələyi, Şirvanşahı, Ağ Aldərə, Həməşərə, Red qlob və s. nadir sortlardan calaq, Mələyi, Şirvanşahı, Ağ Aldərə, Həməşərə və s. Nadir sortlardan calaq tingin alınması, metal torun yerinin qazılması və torun aşağısının doldurulması (20 sm dərinlikdə) kimi işləri həyata keçirməlidir.
Satınalmaların portalı üzərindən apardığımız araşdırmada məlum oldu ki, Üzümçülük və Şərabçılıq Elmi Tədqiqat İnstitutu “İnam Grop 2024” MMC ilə bir müqavilə də 11.02.2025-ci ildə bağlayıb. Polietilen borularının sahədə quraşdırılması işlərinin satınalınması üzrə bağlanmış bu müqavilənin dəyəri 8.460 manat olub.
Göründüyü kimi Üzümçülük və Şərabçılıq Elmi Tədqiqat İnstitutunun keçirdiyi kotirovka sorğusu elmi tədqiqat xidmətləri üzrə deyil, təmir bərpa və yeni bağın salınması məqsədi ilə keçirilib. Təbii ki, sahədə polietilen borularının quraşdırılması işlərini həyata keçirən MMC-nin elmi tədqiqat xidmətləri göstərməsi gülüncdür. Bəs onda Üzümçülük və Şərabçılıq Elmi Tədqiqat İnstitutu kotirovkanı niyə məhz elmi tədqiqat xidmətləri adı altında keçirir?
Qeyd edək ki, Üzümçülük və Şərabçılıq Elmi Tədqiqat İnstitutunun işbirliyində olduğu “İnam Grop 2024” MMC barədə açıq mənbələrdə heç bir məlumat yoxdu.
Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “İnam Grop 2024” (VÖEN: 1008608871) Məhdud Məsuliyyətli Cəmiyyətinin 30.04.2024-cü ildə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanının BAKI ŞƏHƏRİ, BİNƏQƏDİ RAYONU, MİR CƏLAL 9A MKR, ev.60, qanuni təmsilçisinin isə Şərifov Nazim Qurban oğlu olduğu göstərilir. MMC-nin hazırkı günə 488.01 manat vergi borcu var.
Qeyd edək ki, Kənd Təsərrüfatı Nazirliyinin Üzümçülük və Şərabçılıq Elmi Tədqiqat İnstitutunun direktoru Vüqar Səlimovdur. Elektron mediada Üzümçülük və Şərabçılıq Elmi-Tədqiqat İnstitutu tərəfindən keçirilmiş açıq tender və kotirovka sorğusu prosedurlarında ciddi qanun pozuntularına yol verildiyinə dair geniş məlumatlar var.
Aktualinfo.net.
