Görmə qabiliyyətini itirmiş Əmirəliyev Vəli Gəncə icra hakimiyyətinə raket zərbəsi ilə dağılan evi ilə bağlı dəfələrlə müraciət edib. Ancaq İcra hakimiyyəti müraciət daxil olmadığını deyir.
Gəncə şəhər sakini Əmirəliyev Vəli Ənvər oğlu tərəfindən daxil olan şikayətə əsasən, o, raket zərbəsi nəticəsində dağılan evi ilə bağlı dəfələrlə müraciət etsə də, ona heç bir kömək göstərilməyib. Muxtar Hacıyev küçəsi, ev 9-da yaşayan vətəndaş bildirib ki, 2020-ci ildə düşmən tərəfindən atılan raket zərbəsi nəticəsində evi dağılıb. Onun sözlərinə görə, ərazi babasının adınadır. Partlayışdan sonra Gəncə Şəhər İcra Hakimiyyətinin nümayəndələri və FHN-in əməkdaşları əraziyə baxış keçirib, çəkiliş aparıb və evin bərbad vəziyyətdə olduğunu görüblər. Şikayətçi hazırda evdə ailə yaşamadığını, həmçinin görmə qabiliyyətini ömürlük itirdiyini də bildirib. Ev bərbad vəziyyətdə olduğu üçün qoruyucu çəkdiyini deyib.
Şikayətçinin sözlərinə görə, onun şəxsiyyət vəsiqəsi götürülərək akt tərtib edilib. Daha sonra ona bildirilib ki, 1000 manat məbləğində kompensasiya veriləcək və köməklik göstəriləcək. Hətta qeyd olunub ki, ev qəzalı vəziyyətdədir, buna görə də sakin müvəqqəti köçürüləcək və ev yenidən təmir ediləcək. Vətəndaş deyib ki, o, dəbdəbəli ev istəmir. Hazırda yağış yağanda evin içinə su damır, külək əsəndə hər tərəfdən içəri dolur.
O bildirib ki, Gəncə Şəhər İcra Hakimiyyətinin, həmçinin Nizami Rayon İcra Hakimiyyətinin nümayəndələrinə dəfələrlə sənədlərini təqdim edib. Lakin nəticə barədə soruşduqda ona “sənəd yoxdur” cavabı verilib. Bundan sonra sənədlər yenidən təqdim olunub. İki gözdən əlil olmasına baxmayaraq, o, çətinliklə də olsa icra hakimiyyətinin dördüncü mərtəbəsinə qalxıb. Nəhayət, 2022-ci ildə komissiya əraziyə baxış keçirdikdən sonra qeydiyyatda olması təsdiqlənib. Lakin ona bildirilib ki, komissiya məsələyə 3-4-cü dəfə yenidən baxacaq.
Şikayətçi qeyd edib ki, ona məktub da yazdırılıb, amma həmin məktuba cavab verilməyib. O, həmçinin Şəhərsalma İdarəsinə də müraciət etdiyini, lakin idarədən bunun onların səlahiyyətində olmadığı və komissiya gələndə məsələyə baxılacağı bildirilib.
Vətəndaş əlavə edib ki, çoxsaylı müraciətlərinə baxmayaraq, nəticə yoxdur. İcra başçısının qəbuluna getmək istəyib, lakin ona Gəncə şəhərində dağıdılmış evlərlə bağlı heç kimin qəbul edilmədiyi bildirilib.
Sonuncu dəfə Gəncə Şəhər İcra Hakimiyyətinə yoxlama gəldikdə, o, həmin nümayəndələrlə görüşmək istəsə də, icra hakimiyyətinin əməkdaşları bunun mümkün olmadığını, sadə vətəndaşların qəbul edilmədiyini deyiblər.
“Kimə, hara müraciət edirəmsə, heç bir nəticə yoxdur”, – deyə şikayətçi bildirib.
Mövzu ilə bağlı Gəncə Şəhər İcra Hakimiyyəti ilə əlaqə saxladıq. Qurumdan bildirilib ki, bu hadisə ilə bağlı onlara müraciət daxil olmayıb:
” Məlum olduğu kimi, Ermənistan Respublikası silahlı qüvvələrinin 2020-ci il sentyabrın 27-dən etibarən Azərbaycan Respublikasına təcavüzü nəticəsində mülki əhaliyə və dövlət əmlakına, o cümlədən infrastruktur obyektlərinə və sahibkarlıq subyektlərinə dəymiş ziyanın qiymətləndirilməsi və aradan qaldırılması ilə bağlı Azərbaycan Respublikası Prezidentinin 06.11.2020-ci il tarixli 2292 nömrəli Sərəncamının icrası məqsədilə Nazirlər Kabinetinin 11 noyabr 2020-ci il tarixli 612s nömrəli Sərəncamı ilə Dövlət Komissiyasının işinin təşkili üçün aidiyyəti dövlət qurumlarının nümayəndələrindən ibarət işçi qrupları yaradılmışdır. İşçi qrupu 2020-ci ilin noyabr və 2021-ci ilin iyun aylarında Gəncə şəhərində fəaliyyət göstərmişdir. Bu müddət ərzində şəhər İcra Hakimiyyətinin məsul əməkdaşları tərəfindən raket zərbələrinin radiusuna düşən ərazilərdə sakinlərlə mütəmadi görüşlər keçirilmiş, izahatlar verilmişdir. İşçi qrupunun fəaliyyəti zamanı Gəncə şəhəri, A.İmanquliyeva küçəsi, ev 9 ünvanında yerləşən fərdi yaşayış evinin zərər görməsi ilə bağlı müraciət daxil olmamışdır. Buna görə də həmin ünvana işçi qrup tərəfindən baxış keçirilməsi və aktın tərtib olunması mümkün olmayıb”./ajans.az
