Kiyev və digər Ukrayna şəhərlərinin son kütləvi atəşə tutulması ilə Rusiya dünyaya sülh təkliflərinə əsl münasibətini göstərir.
Bunu Ukrayna Prezidenti Volodimir Zelenski X sosial media platformasında yazıb.
“Bu günlərdə bir çox suallar olub. Hanı ABŞ və dünya tərəfindən təqdim edilən müharibənin dayandırılması təkliflərinə Rusiyanın cavabı? Rusiya nümayəndələri uzun söhbətlər aparırlar, amma əslində onların yerinə danışan “Kinjal” və “Şahed”-lərdir”, – deyə o yazıb.
Dövlət başçısı əlavə edib ki, bu, “Putin və onun ətrafındakıların sülhə əsl münasibətidir”.
“Onlar müharibəni bitirmək istəmirlər, Ukraynaya daha çox ağrı vermək və dünyada digərlərinə təzyiqlərini artırmaq üçün hər fürsətdən istifadə etməyə çalışırlar. Bu o deməkdir ki, cavab olaraq kifayət qədər təzyiq yoxdur”, – deyə Zelenski bildirib.
O, ABŞ və Avropanı Rusiyaya təzyiqi artırmağa və Ukraynanı silahlarla, xüsusən də hava hücumundan müdafiə sistemləri ilə dəstəkləməyə çağırıb.
Qeyd edək ki, bu gecə Rusiya Ukraynaya daha bir kütləvi hücum təşkil edib. Xüsusilə Kiyevə ballistik raketlərlə hücum edilib. Son məlumatlara görə, 28 nəfər yaralanıb.
