Erməni müxalifəti isə Rusiya və İrandan narahatdır
ABŞ Vitse-prezidenti Cey Di Vensin Ermənistana səfəri ərəfəsində ABŞ İrəvana bir növ “hərbi jest” edərək, müasir PUA-lar verib.
Erməni mediasının yazdığına görə, Ermənistana 20 yeni PUA veriləcək. Əsasən kəşfiyyat xarakterli dronlar sayılan bu PUA-ların hər birinin qiyməti, yenə erməni mənbələrinin bildirdiyinə görə, 500.000 dollardır.
Təbii ki, hər nə qədər Azərbaycanla Ermənistan arasında sülh müqaviləsinin imzalanması, münasibətlərin, kommunikasiyaların, iqtisadi və hətta turizm əlaqələrinin bərpası mövzusu aktuallaşdırılsa da, bu dövlətlə münasibətdə ehtiyatı əldən vermək qətiyyən doğru sayıla bilməz. Ermənistandakı siyasi vəziyyəti, Rusiyanın və Qərbin bu ölkədəki maraqlarını, ona təsir imkanlarını, gələcəkdə gözlənilən daxili siyasi qarşıdurmaları və s. nəzərə alsaq, İrəvanın Azərbaycanla bugünkü sülh gündəliyinin nə zamansa yenidən hərbi qarşıdurma gündəliyi ilə əvəz olunmasını istisna etmək olmaz. Bu baxımdan Ermənistanın, kim tərəfindən olmasından asılı olmayaraq, yeni silahlarla, PUA-larla və digər hərbi avadanlıqlarla təchiz olunması Azərbaycan üçün arzuolunan deyil. ABŞ-nin Ermənistana 20 müasir kəşfiyat PUA-sı verməsi qərarı da bu sarıdan bizim üçün təbii ki, mənfi haldır…
Lakin maraqlıdır ki, Ermənistanın özündə ABŞ PUA-ları mövzusu daha çox Azərbaycan və Türkiyə deyil, Rusiya və İran kontekstində müzakirə edilməkdədir. Şərhçilərin əksəriyyəti bu kəşfiyyat dronlarının regiondakı Rusiya və İranın hərbi varlığını izləmək üçün istifadə olunacağını iddia edirlər.
Məsələn, erməni mediasında Ermənistan Milli Konqres Partiyasının sədr müavini Aram Manukyanın müsahibəsi dərc edilib. Vensin səfərini şərh edən erməni siyasətçi ABŞ ilə münasibətlərin daha da yaxınlaşması görüntüsünün aldadıcı ola biləcəyini deyib: “Ermənistan-Amerika münasibətləri inkişaf edir və bu, çox müsbət haldır: nə qədər çox dostumuz olsa, bir o qədər yaxşıdır. Lakin detallara nəzər salsaq, təsadüfi müşahidəçinin asanlıqla fərqinə varmadığı şeyləri aşkar edəcəyik və bu baxımdan hakimiyyətin entuziazmı yersizdir. İndi bir az gözləməli və Azərbaycanda nə baş verəcəyini görməliyik”.
Manukyan ABŞ PUA-ları barədə danışarkən, onların Ermənistana xeyrindən çox təhlükə yaratdığını iddia edib: “Ermənistan hər biri təxminən yarım milyon dollara başa gələn 20 dron alacaq və bunlar kəşfiyyat dronlarıdır. Əlbəttə ki, hərbi-iqtisadi və texniki əməkdaşlığın olması yaxşıdır, lakin bunların kəşfiyyat dronları olması ilə bağlı ciddi bir risk, təhlükə var. Onlar Rusiya və İran tərəfindən son dərəcə mənfi qəbul ediləcək. Burada Rusiya bazası var və onlar həm Rusiya bazasında, həm də İran tərəfində asanlıqla kəşfiyyat apara bilərlər. Onlar 100-150 km məsafədə kəşfiyyat apara, məlumat toplaya və ötürə bilərlər. Xüsusilə, bu PUA-lardan Ukraynada Rusiyaya qarşı istifadə edilib, təxminən 150 uçuş həyata keçirilib və onlar Rusiya bazalarını, Rusiya avadanlıqlarını aşkar ediblər. Bu məlumatlar Ukrayna tərəfinə ötürülüb və ukraynalılar bu obyektləri məhv ediblər. Bu, təbii ki, hərbi-strateji müttəfiqliyimiz olan Rusiya tərəfini narahat edəcək”.
O qeyd edib ki, bu dronların Ermənistana verilməsini ruslar üçün qəbul etdirmək çətin olacaq: “Biz bu sistemin bir hissəsiyik; Türkiyə ilə sərhədimizi rus əsgərləri qoruyur və İran faktoru getdikcə güclənir. Amerikalılar daim açıq şəkildə İran əleyhinə koalisiyanı dəstəklədiklərini bəyan edir və bu proqrama daxil ediləcək ölkələri özlərinə cəlb edirlər. Bu mənada bizə verilən dronlar İranda da narahatlıq yaradacaq”.
Qeyd edək ki, Ermənistanda bu cür düşünən təkcə Manukyan deyil. Bir çoxları hesab edir ki, ABŞ-nin Ermənistana qarşı bu səxavəti təsadüfi deyil və həmin kəşfiyyat PUA-larından ABŞ-nin maraqları çərçivəsində Rusiya bazasının və İranın izlənməsi üçün istifadə olunacaq. Bu isə Ermənistanı təhlükəli vəziyyətdə, hətta zərbə altında qoya bilər.
Lakin əvvəldə də qeyd etdiyimiz kimi, Azərbaycan Ermənistana istənilən növ silah tədarükünə öz maraqları və təhlükəsizliyi prizmasından baxmalıdır. Azərbaycan ordusu belə silahlara qarşı müasir müdafiə və hücum vasitələri ilə təmin olunmalıdır. Çünki tarixin sübut etdiyi kimi, ermənilərə verilən istənilən silah, istəniləndə Azərbaycana qarşı çevrilə bilər…/azpolitika.info
