Son illər Azərbaycan Hava Yolları ətrafında gözləntilər böyük idi. Bildirilirdi ki, yeni rəhbərliklə birlikdə şirkət daha da inkişaf edəcək, xidmət səviyyəsi yüksələcək, beynəlxalq rəqabətdə daha iddialı olacaq. Lakin reallıqda sərnişinlərin bir qismi bunun əksini düşündüyünü açıq şəkildə ifadə edir.
Bir vaxtlar model daha aydın idi. “Buta Airways” daha iqtisadi, daha sərfəli uçuşlar təklif edən brend kimi fəaliyyət göstərirdi. AZAL isə daha komfortlu, daha geniş xidmət paketi təqdim edən, premium seqmentə xitab edən hava yolu sayılırdı. Sərnişin ya ucuz, ya da daha rahat seçim edə bilirdi.
“Buta Airways”in AZAL ilə birləşdirilməsindən sonra isə bu balans pozuldu. İqtisadi model aradan qalxdı, amma AZAL-ın xidmət səviyyəsi yerlərdə sürünür. Xüsusilə tez-tez uçan müştərilər üçün nəzərdə tutulan imtiyazlarda ciddi dəyişikliklər hiss olunur.
Əvvəllər “Silver”, “Gold”, “Platinum” kimi statusların verdiyi üstünlüklər daha əlçatan idi. İndi isə həmin imtiyazların əsas qismi daha yüksək səviyyəyə – “Elit”ə keçirilib və faktiki olaraq daha dar bir qrupa şamil olunur. Kağız üzərində çoxsaylı üstünlüklər göstərilsə də, sərnişinlər onların praktik dəyərinin zəif olduğunu bildirirlər. Sanki siyahı uzundur, amma real fayda azdır.
Narazılıq bununla da bitmir. Son dövrlər ən çox səslənən şikayətlərdən biri də artıq bilet satışı ilə bağlıdır. İddialara görə, bəzi reyslərdə təyyarədəki real yerlərin sayından artıq bilet satılır. Hesab edilir ki, müəyyən sayda sərnişin uçuşa gəlməyəcək. Lakin hamı gəldiyi halda bir neçə nəfər reysdən kənarda qalır və növbəti uçuşa yönləndirilir. Bu isə xüsusilə vaxt məhdudiyyəti olan sərnişinlər üçün ciddi problem yaradır.
Keçmiş rəhbərlik dövründə bu cür halların müşahidə olunmadığını deyənlər də var. İndi isə kommersiya marağının xidmət keyfiyyətini üstələdiyi barədə tənqidlər artır. İnsanlar hesab edir ki, əlavə gəlir naminə sərnişin məmnuniyyəti arxa plana keçirilib.
Nəzərə alsaq ki, AZAL ölkənin əsas hava daşıyıcısıdır və onun imici təkcə bir şirkətin deyil, ümumilikdə ölkənin aviasiya sektorunun nüfuzuna təsir edir. Artan şikayətlər fonunda əsas sual budur ki, şirkət sərnişin etimadını necə bərpa edəcək? Yeni mərhələdə prioritet qazanc olacaq, yoxsa keyfiyyət və etibar?
Məsələ artıq sosial şəbəkə müzakirəsi səviyyəsindən çıxaraq ictimai gözləntiyə çevrilib. İndi gözlər AZAL rəhbərliyinin atacağı real addımlardadır./yenicag.az
