Bakıda daşınmaz əmlak bazarında həm satış, həm də icarə qiymətlərində artım davam edir. Ekspertlər hesab edirlər ki, son illərdə müşahidə olunan bahalaşma bazarda tələbin yüksək olması və təklifin məhdudluğu ilə bağlıdır.
Bu barədə açıqlamasında əmlak eksperti Elnur Azadov bildirib ki, hazırda bazarda qiymət artımı həm mənzillərin satışında, həm də icarəsində müşahidə olunur.
Onun sözlərinə görə, bu proses birbaşa hansısa nəzarətin olmaması ilə bağlı deyil, lakin bazarda müəyyən tənzimləmə mexanizmlərinin tətbiqi qiymətlərin daha stabil olmasına kömək edə bilər:
“Qiymət dayanmadan artır istər icarə, istərsə də satış qiymətləri. Sözsüz ki, burada hansısa bir nəzarətdən və yaxud nəzarətsizlikdən söhbət getmir. Düzdür, nəzarət mexanizmi tətbiq olunsa, qiymətlər daha stabil olar və iqtisadiyyatımıza uyğun səviyyədə formalaşar”.
Ekspert qeyd edib ki, ən yüksək qiymətlər ənənəvi olaraq paytaxtın mərkəzi hissəsində müşahidə olunur. Son dövrlər isə yeni tikililərin cəmləşdiyi Ağ Şəhər ərazisində də qiymətlər sürətlə artıb:
“Qiymətlərin ən yüksək həddi şəhərin mərkəzi hissəsindədir. Son vaxtlar Ağ Şəhərə də tələbat artıb. Amma nəzərə almaq lazımdır ki, burada mənzillərin qiymətləri həddindən artıq şişib. Xüsusilə mərkəzdə dənizə yaxın, dəniz mənzərəli mənzillər daha yüksək qiymətə təklif olunur”.
Elnur Azadov bildirib ki, bəzi hallarda bazarda 50-60 faizədək qiymət artımı müşahidə olunur ki, bu da ölkə iqtisadiyyatının real göstəriciləri ilə tam uyğun gəlmir:
“Bizdə müşahidə olunan 50-60 faizlik qiymət artımı iqtisadiyyatımıza uyğun deyil. Bu, ilk növbədə tikinti şirkətləri arasında rəqabətin azalması ilə bağlı yaranan vəziyyətdən qaynaqlanır. Digər tərəfdən, daşınmaz əmlak çatışmazlığı vətəndaşların mənzil axtarışını intensivləşdirir və bu da qiymətlərə təsir edən əsas amillərdən biridir”.
Ekspertin sözlərinə görə, mənzil qıtlığı icarə bazarında da özünü göstərir və xüsusilə mərkəzi ərazilərdə qiymətlər daha yüksəkdir:
“Qıtlıq icarə bazarında da müşahidə olunur. Tələbat olan ərazilərdə qiymətlər daha yüksəkdir. Şəhərin mərkəzi hissəsində həm yerli əhali, həm də turizm axını var. Eyni zamanda tələbələr üçün metrolara yaxın, aktiv yol infrastrukturu olan ərazilərdə, xüsusilə bir otaqlı və kiçik mənzillərə tələbat çox olduğuna görə qiymətlər normadan yüksəkdir”.
Elnur Azadov əlavə edib ki, son illərdə daşınmaz əmlak daha çox investisiya məqsədilə alınır və bu da icarə qiymətlərinə təsir edir:
“Daşınmaz əmlakın investisiya məqsədilə alınmasında müəyyən geri dönüş dövrü var. Adətən, yeni alınan mənzillər bazar qiymətindən bir qədər yuxarı qiymətə icarəyə verilir və bu normaldır. Ümumiyyətlə, ölkəmizdə daşınmaz əmlaka qoyulan investisiyanın geri dönüş müddəti orta hesabla 20 ilə çatıb. Halbuki əvvəllər bu göstərici təxminən 15 il idi”.
Ekspert bildirib ki, paytaxtda daha münasib qiymətə mənzil tapmaq üçün əsasən şəhərin kənar ərazilərinə və infrastrukturun zəif olduğu qəsəbələrə üz tutmaq lazımdır:
“Daha ucuz qiymətlər Bakı şəhərinin kənar ərazilərindədir. Əsasən, hələ infrastrukturu tam formalaşmamış bağ ərazilərində və şəhərdən uzaq qəsəbələrdə belə mənzillər var. Məsələn, Zirə, Türkan, Abşeron rayonunun bəzi əraziləri, Güzdək, qismən Qobu, Hökməli, Müşviqabad, həmçinin Ceyranbatan kimi ərazilərdə qiymətlər nisbətən aşağıdır”.
Ekspert hesab edir ki, yaxın dövrdə tələbin yüksək qalması fonunda daşınmaz əmlak bazarında qiymət artımı tendensiyası müəyyən müddət davam edə bilər./yenicag.az
