Bakıda fərdi yaşayış evlərinin alqı-satqı bazarında son dövrlər nəzərəçarpacaq durğunluq müşahidə olunur. Qiymətlərin yüksək qalması və alıcılıq qabiliyyətinin zəifləməsi bazarda aktivliyi azaldıb. Eyni zamanda kredit şərtlərinin sərtləşməsi də potensial alıcıların qərarına təsir edir. Bu vəziyyətin nə qədər davam edəcəyi və bazarın yenidən canlanıb-canlanmayacağı isə sual doğurur.
Mövzu ilə bağlı açıqlamasında daşınmaz əmlak və inşaat üzrə ekspert Elnur Azadov bildirib ki, Bakıda pandemiyadan sonrakı dövrdə stabil qiymət artımı müşahidə olunur.
Onun sözlərinə görə, ən yüksək qiymət artımı 2022-2023-cü illərdə Bakı şəhərində mənzil fondunda qeydə alınıb: “Artım təxminən 17-18 faiz, bəzi hallarda isə 20 faizə qədər olub. Ümumilikdə isə mənzil fondu bazarında illik artım ən azı 11-12 faiz səviyyəsindədir. Söhbət əsasən Bakı şəhərində çoxmənzilli binalardan gedir. Bunun bir səbəbi ondan ibarətdir ki, 2021-ci ildə Qarabağ iqtisadi zonasında və Şərqi Zəngəzur zonasında kütləvi inşaat layihələrinə start verildi. Nəticədə armaturun qiyməti kəskin bahalaşdı. Belə ki, 1 tonun qiyməti 780 manatdan 1200 manata qədər yüksəldi”.
Ekspert qeyd edib ki, daha sonra tikinti şirkətlərinə verilən icazələrin sayı ciddi şəkildə azalmağa başladı: “Hazırkı vəziyyətdə 2026-cı ili 2016-cı illə müqayisə etsək, bazarda tikinti şirkətlərinin aktivliyi təxminən 8-10 dəfə azalıb. Bu qıtlıq qiymət artımını şərtləndirir. Alıcılar uyğun qiymətə daşınmaz əmlak tapmaqda çətinlik çəkirlər, satıcılar isə qiymətləri daha yüksək təklif etməyə çalışırlar. Son illərdə ipoteka kreditlərinə müraciətlərin sayı da artıb. Daşınmaz əmlakın əlçatan olmaması səbəbindən bir çox vətəndaş ipotekaya üstünlük verir. 2024-cü ilin dekabr ayına qədər bazar kifayət qədər aktiv idi, lakin ilin sonunda artım tempi nisbətən zəiflədi. 2025-ci ilin sonunda da oxşar vəziyyət müşahidə olundu. Baxmayaraq ki, son bir ay ərzində ipoteka kreditləri yenidən aktivləşib, banklar və kredit təşkilatları tərəfindən bazar aktivliyi əvvəlki illərlə müqayisədə nisbətən zəifdir. Bunun fonunda qiymət artımı qismən davam edir. Sual yaranır: bu proses nə vaxta qədər davam edəcək? Mənim fikrimcə, bazarın tələbatı ödənildikcə müəyyən sabitlik yaranacaq. Hazırda bazarda ciddi canlanma yoxdur. Güman edilir ki, gələn il bazar daha aktiv olacaq”.
