Türkmənistan Azərbaycanın “yaşıl enerji” təcrübəsini tətbiq edir.
Bunu Türkmənistan Prezidentinin yanında Arkadağ şəhərinin tikintisi üzrə komitənin nümayəndəsi Irina Grishkova Ümumdünya Şəhərsalma Forumu (WUF13) çərçivəsində keçirilən SPECA Şəhərlər Forumunda jurnalistlərə açıqlamasında deyib.
O bildirib ki, Azərbaycanın son illərdə ekologiya və alternativ enerji sahəsində həyata keçirdiyi layihələr Türkmənistan üçün də maraqlı təcrübədir: “Azərbaycanda alternativ enerji mənbələrinə böyük diqqət yetirilir. Biz də sizin təcrübənizə baxaraq bu istiqamətdə addımlar atırıq. Hazırda Arkadağ şəhərinin ikinci mərhələsinin tikintisi çərçivəsində dəmir yolu vağzalı və avtovağzal kimi iri obyektlərdə günəş enerjisindən istifadə olunur. Gündüz saatlarında bu obyektlərdə enerji istehlakı daha çox olur. Dövlət enerji şəbəkəsindən istifadəni azaltmaq üçün həmin obyektlərdə günəş panelləri quraşdırılıb”.
Onun sözlərinə görə, bu yanaşma atmosferə atılan qaz tullantılarının azaldılmasına da imkan yaradır. “Arkadağ şəhərinin tikintisi zamanı ilk dəfə olaraq yağış sularının təkrar istifadəsi sistemi qurulub. Toplanan yağış suları ilkin təmizlənmədən keçir, daha sonra çökdürücü hovuzlara yönləndirilir və nəticədə şəhərin yaşıllıq sahələrinin suvarılmasında istifadə olunur”.
O bildirib ki, şəhərin tikintisi zamanı aşkarlanan yeraltı sular da xüsusi drenaj sistemi vasitəsilə toplanaraq yenidən suvarma məqsədilə istifadə edilir: “Hazırda Arkadağda kanalizasiya sularının əlavə təmizlənərək yaşıllıq sahələrinin suvarılmasına yönəldilməsi üzərində də iş aparılır. Biz su ehtiyatlarını qorumağa çalışırıq. Çünki əsas su mənbələrimiz yeraltı şirin su ehtiyatları və Qaraqum kanalıdır”.
