Ötən həftə Ağ Evdə Donald Trampla Volodimir Zelenski arasında gərgin görüş baş verdi və daha sonra Zelenski İngiltərəyə gedib, orada mühüm görüşlər keçirəndən sonra, rəsmi Vaşinqton ilə Kiyev arasında münasibətlər daha da kəskinləşdi. Birləşmiş Ştatlar Ukraynaya yardımını dayandırdı, Tramp isə Zelenskiyə qarşı əlavə cəbhə açdı. Lakin son xəbərlərə nəzər salanda, Kiyevin mövqeyini dəyişdirdiyi görünür. Belə ki, əvvəl Ukrayna prezidenti amerikalı həmkarının ona Rusiya ilə sülh bağlaması istiqamətində atacağı addımlarla bağlı şərtlərindən sonra, etirazı səbəbilə Ağ Evdən “qovulmuşdusa”, indi sülh əldə etmək üçün Trampın rəhbərliyi altında işləməyə hazır olduğunu bəyan edib:
“Ukrayna ABŞ ilə “istənilən vaxt və istənilən əlverişli formatda” faydalı qazıntılar üzrə saziş imzalamağa hazırdır”, – deyə Zelenski ötən gün diqqətə çatdırıb.
Elə həmin gün Donald Tramp Konqresdəki çıxışında Baydeni ABŞ tarixinin ən bərbad prezidenti adlandırıb və Birləşmiş Ştatların heç bir zəmanət olmadan Ukraynanın müdafiəsinə milyonlarla dollar pul xərclədiyini, müharibəyə son qoyulacağını qeyd edib.
Qafqaz Strateji Araşdırmalar Mərkəzinin (KAFKASSAM) sədri, türkiyəli siyasi tədqiqatçı Hasan Oktay açıqlamasında deyib ki, Fransa və İngiltərə müharibənin davam etməsini, digər tərəfdən isə hamının qəbul edəcəyi sülhün bərqərar olmasını istəyirlər:
“Gələn həftə Fransa və İngiltərə Zelenski ilə Amerikaya səfər edəcək və Trampla görüşəcək. Trampın Zelenskiyə qarşı davranışı fonunda Ukrayna liderinin Trampa sazişlə bağlı məktub yazmasını nəzərə alsaq, gedişat sülh atmosferini meydana gətirir. Zelenski Trampla ilk görüşündə ABŞ prezidentinin ukraynalı həmkarının əleyhinə olan sülh şərtləri irəli sürəcəyi düşünülürdü, lakin sonrakı dövrdə Tramp Ukrayna böhranını Avropa İttifaqına həvalə etməklə, Rusiyaya tətbiq etdiyi embarqoları yumşaldaraq Ukrayna-Rusiya sülhdən daha çox Tramp-Putin sülhünə çevirmiş kimi görünür. Tramp əslində mesaj verdi ki, ABŞ Avropa İttifaqı üzərindəki qalxanı qaldırır, Amerika artıq kənarda maliyyə və hərbi yardımla etməyəcək, dolayısı ilə Ukrayna məsələsində də Rusiya ilə Avropanı bir-birinə qarşı qoyacaq və müəyyən mənada bunu da yeni həll yolu kimi təqdim edir. Trampın planı əvvəlcə Ukraynanı razı salmaq, daha sonra ola bilsin ki, Aİ-ni özündən asılı salaraq Çinə qarşı böyük əməliyyat keçirməkdir”.
