Fransanın xarici işlər naziri Jan-Noel Barro Avropa İttifaqının (Aİ) Rusiyaya qarşı son üç ildə tətbiq edəcəyi ən sərt sanksiyalar paketini elan edib. Onun sözlərinə görə, bu sanksiyalar Moskvanın Ukraynaya qarşı apardığı müharibəni davam etdirməsinə imkan verən əsas maliyyə mənbələrini hədəfə alacaq.
Nazir bu barədə TF1 Info telekanalına açıqlamasında məlumat verib. Bildirib ki, Aİ-nin növbəti – 18-ci sanksiyalar paketi Fransanın təşəbbüsü ilə hazırlanıb və əsas məqsədi Vladimir Putini atəşkəsə məcbur etməkdir: “Biz istəyirik ki, Putin nəhayət atəşkəsə razılaşsın. Çünki prezident Tramp 30 günlük atəşkəs təklif etdikdən sonra Rusiya Ukraynaya qarşı zərbələrini beş dəfə artırıb”, – deyə Barro vurğulayıb.
Nazir qeyd edib ki, sanksiyalar əsasən enerji sektorunu – xüsusilə Rusiya neftinin ixracından əldə edilən gəlirləri və həmçinin Rusiya ilə üçüncü ölkələrdən olan maliyyə oyunçularını hədəfləyəcək.
Qeyd edək ki, Aİ Rusiya-Ukrayna müharibəsinin başladığı 2022-ci ilin fevralından bu günə qədər artıq 17 sanksiyalar paketi qəbul edib. Növbəti – 18-ci paketdə Rusiyanın xam neftinin qiymət tavanının 60 dollardan 45 dollara endirilməsi, eləcə də “Şimal axını” qaz layihəsi çərçivəsində bütün maliyyə əməliyyatlarının qadağan edilməsi nəzərdə tutulurdu.
Lakin “Deutsche Welle”nin məlumatına görə, Slovakiyanın mövqeyi səbəbindən bu paket iyunun sonunda təsdiqlənməyib və təxirə salınıb.
Moskva isə Brüsselin sanksiya planlarına ehtiyatla yanaşır. Rusiya Prezidentinin mətbuat katibi Dmitri Peskov bildirib ki, Kremlin cavab addımları olacaq: “Təbii ki, vəziyyəti diqqətlə izləyəcəyik və bu illər ərzində öyrəndiklərimizə əsaslanaraq, bu qeyri-qanuni məhdudiyyətlərin təsirini minimuma endirməyə çalışacağıq”, – deyə Peskov qeyd edib. /azpolitika.info
