Dövlət Sərhəd Xidməti rəisinin müavini, general-leytenant İlham Mehdiyevin vəzifədən azad edilməsi barədə bəzi sosial şəbəkə hesablarında yayılan iddialar əsassızdır.
Bu barədə sorğuya cavab olaraq DSX-dən bildirilib.
Qeyd edək ki, İlham Mehdiyev şərəfli tərcümeyi-hala malikdir. İlham İsmayıl oğlu Mehdiyev 2 avqust 1965-ci ildə Balakən rayonunun Hənifə kəndində anadan olub. 1983–1987-ci illərdə Odessa Ali Artilleriya Komandirləri Hərbi Məktəbində təhsil alıb.
1987–1991-ci illərdə Sovet ordusunda Hava-Desant Qoşunlarında xidmət edib.
2003-cü ildə Dövlət Sərhəd Xidmətinin Beynəlxalq Əlaqələr İdarəsinin rəisi vəzifəsinə təyin edilib. 2004-cü ildə Dövlət Sərhəd Xidməti rəisinin şəxsi heyət üzrə müavini – Şəxsi Heyət üzrə Baş İdarənin rəisi vəzifəsi ona həvalə olunub.
2020-ci ildə, Qarabağ müharibəsi başlayarkən o, artıq Dövlət Sərhəd Xidməti rəisinin döyüş hazırlığı üzrə müavini vəzifəsində idi.
2002-ci ildə “Hərbi xidmətlərə görə” medalı, 2007-ci ildə “Vətən uğrunda” medalı, 2008-ci ildə 3-cü dərəcəli “Vətənə xidmətə görə” ordeni, 2012-ci ildə “Azərbaycan Bayrağı” ordeni, 2014-cü ildə “İgidliyə görə” medalı, 2019-cu ildə 3-cü dərəcəli “Rəşadət” ordeni ilə təltif edilib.
16 avqust 2016-cı ildə “general-leytenant” hərbi rütbəsi alıb.
İlham Mehdiyev İkinci Qarabağ savaşında göstərdiyi igidliklərə görə Vətən Müharibəsi Qəhrəmanı adı alıb.
