Rusiyanın yüksək rütbəli rəsmiləri son günlər Vaşinqtonla münasibətlərin vəziyyəti ilə bağlı ziddiyyətli açıqlamalar verirlər. Belə ki, Rusiya Xarici işlər nazirinin müavini Sergey Ryabkov dünən bəyan edib ki, “Rusiya-Amerika münasibətlərinin binası dağılır” və Vladimir Putinlə ABŞ Prezidenti Donald Tramp arasında keçirilən görüşdən yaranan “Ankoric impulsu” “böyük dərəcədə tükənib”.
Lakin Vladimir Putinə daha yaxın şəxs sayılan Rusiya Prezidentinin köməkçisi Yuri Uşakov tamamilə başqa fikirdədir.
Oktyabrın 9-da Yuri Uşakov ABŞ-Rusiya münasibətlərinin fiaskoya uğradığı barədə iddiaların “tamamilə yanlış” olduğunu bəyan edərək, iki administrasiya arasında əlaqələrin Ankoricdə əldə edilmiş razılaşmalar əsasında “müntəzəm olaraq həyata keçirildiyini” vurğulayıb.
Oktyabrın 8-də Ryabkov münasibətlərdəki böhrana görə məsuliyyəti ABŞ-nin üzərinə atıb və bunu “avropalıların dağıdıcı fəaliyyəti” ilə izah edib. O, həmçinin xəbərdarlıq edib ki, Amerikanın “Tomaqavk” raketlərinin Ukraynaya mümkün tədarükü “ciddi eskalasiya addımı” olacaq.
Ancaq bir gün sonra Uşakov bəyan edir ki, Ankoricdə əldə olunan razılaşmalar “çoxlarının bundan məyus olmasına baxmayaraq, işləyir”: “Xüsusən də, bu razılaşmalar və anlaşmalar əsasında biz amerikalı tərəfdaşlarımızla əlaqələri davam etdiririk və davam etdirəcəyik”.
Bu ziddiyyətli bəyanatlar Ukraynadakı müharibənin həlli üzrə danışıqların dalana dirəndiyi bir vaxtda verilir. Sülhməramlı səylər çərçivəsində Tramp əvvəllər sanksiyaların ləğvini, Krımın Rusiya ərazisi kimi tanınmasını və Arktikadakı layihələr də daxil olmaqla iqtisadi əməkdaşlığın bərpasını təklif etmişdi. Bununla belə, Putin təkid edib ki, Kiyev Donbasın nəzarətində olan qalan ərazilərini versin,öz ərazisində Qərb sülhməramlılarını yerləşdirməkdən imtina etsin və ordusunu ixtisar etsin.
Beləliklə, Putin və Trampın Alyaskadakı görüşü müharibənin sonunu yaxınlaşdırmadı. Əksinə, danışıqlardan sonra Rusiya Ukraynanın mülki infrastrukturuna hücumlarını gücləndirdi.
“Financial Times”-ın yazdığına görə isə məhz Alyaska sammitindən sonra irəliləyişin olmaması Ağ Evi Ukrayna siyasətinə yenidən baxmağa məcbur edib. ABŞ sonradan Kiyevi Rusiyanın enerji obyektlərinə hücumlar üçün kəşfiyyat məlumatları ilə təmin etdi və bu, bir neçə iri neftayırma zavodunun bağlanmasına, bir sıra regionlarda yanacaq çatışmazlığına səbəb oldu. Vaşinqton, həmçinin Ukraynaya uzaqmənzilli “Tomaqavk” raketlərinin verilməsini müzakirə etməyə başladı.
Bütün bunların fonunda Rusiya rəsmilərinin ziddiyyətli bəyanatlar verməsi, Kremldə ABŞ ilə münasibətlərdə qeyri-müəyyənliyin, çaşqınlığın hökm sürdüyündən xəbər verir.
