“Ermənistanın Zəngəzur üzərində suverenliyi məsələsi hələ də açıq qalır və regiondakı geosiyasi vəziyyət mürəkkəbdir.”
Bunu keçmiş xarici işlər naziri Tofiq Zülfüqarov bildirib. O deyib ki, Zəngəzur bölgəsində faktiki olaraq Ermənistan yalnız yerli özünüidarəetmə orqanlarını idarə edir və hazırkı vəziyyət bir sıra xarici təsirlərdən asılıdır.
T. Zülfüqarov vurğulayıb ki, bu kontekstdə aşağıdakı amillər önəmlidir:
“1992-ci ildən etibarən İranla sərhəddə Rusiya sərhədçiləri MDB-nin xarici sərhədlərini qoruyur.** Yəni bu, Ermənistanın deyil, bütün MDB-nin sərhəd təhlükəsizliyinin təmin olunması üçün nəzərdə tutulub;
– Avropa İttifaqı missiyasının mandatı uzadılıb və missiya təhlükəsizliyin təmin olunmasında nəzarət funksiyasına malikdir.** Bu isə Ermənistanın təhlükəsizlik sahəsində suveren hüquqlarının bir hissəsinin xarici aktorlara ötürülməsi deməkdir;
-ABŞ ilə aparılan danışıqlar nəticəsində isə gözlənilir ki, suveren hüquqların bir hissəsi 100 il müddətinə ABŞ şirkətinə ötürüləcək.** Buraya təhlükəsizlik funksiyaları daxil olmayacaq.
Keçmiş nazir xatırladır ki, Zəngəzurun Azərbaycanla sərhədləri hələ müəyyən edilməyib və delimitasiya, demarkasiya prosesi gözlənilir. T. Zülfüqarov bildirib ki, Almatı Bəyannaməsinə görə bu proses mövcud sərhədlər əsasında aparılmalıdır. Lakin 1992-ci ildə Ermənistan ilə Azərbaycan arasında sərhədlər mövcud olmayıb və Ermənistan bu bəyannaməni hələ də tanımayıb.
Tofiq Zülfüqarov vurğulayıb ki, bu geosiyasi vəziyyət Ermənistan siyasi elitasının yaratdığı “qarışıqlıq”dır və burada xarici oyunçuların subordinasiyası aydın deyil: “Rusiya sərhədçiləri FSB-nin tabeçiliyində olacaq, yoxsa əksinə? Avropa missiyası hər ikisini idarə edəcək? Ermənistan hakimiyyəti haradadır? Onlar hələ də konstitusiyaya əsaslanaraq sərhədlərini Dağlıq Qarabağdan sonra hesab edirlər.”
Keçmiş nazir əlavə edib ki, ümumilikdə bölgədə tam hüquqi xaos hökm sürür və hazırkı durum yalnız Ermənistanın deyil, həm də regiondakı beynəlxalq aktorların maraqları çərçivəsində mürəkkəbləşir. /azpolitika.info
