Apardığımız araşdırmalar göstərir ki, QHT-lərə Dövlət Dəstəyi Agentliyi təkcə qrantların paylanmasında deyil, müxtəlif tədbirlərin keçirilməsi üçün dövlət satınalmalarında da ciddi saxtakarlıq yolunu tutub. Amma, nə karədirsə bu quruma “qaşın üstə gözün var” deyən yoxdur.
Bu sətirlər “Əsgər Ailələrinə Dəstək” İctimai Birliyinin təsisçisi, “Şəhid Ailələri, Qazilər Mərkəzi”nin rəhbəri Mətanət Əsgərqızı tərəfindən daxil olmuş yazıda yer alır.
Məlum aktuallığını nəzərə alıb, yazını olduğu kimi dərc edirik:
Bu ilin əvvəlindəQHT-lərə Dövlət DəstəyiAgentliyi rəsmisi açıqlama verərək, Şuşada QHT-lərin VI İnkişaf və Mübadilə Proqramının, Xankəndidə isə QHT-lərin III Əməkdaşlıq Forumunun keçiriləcəyini bildirmişdir. Yəni, bu tədbirlər artıq Agentliyin planına daxil edilibmiş, bunlar təcili ortaya çıxan tədbirlər deyilmiş.
Lakin, dövlət satınalmalar portalında axtarışdan məlum olur ki, hər iki tədbir üçün “bir mənbə” satınalma metodundan istifadə edilərək “BRİGHT SOLUTİONS” MMC ilə müqavilə bağlanmışdır.
“Dövlət satınalmaları haqqında” Azərbaycan Respublikasının Qanununun 49-cu maddəsində aydın göstərilir ki, “bir mənbə” satınalma metodu nə zaman tətbiq edilə bilər:
49.1.1. satınalma predmeti yalnız hər hansı konkret təchizatçıda olduqda və ya hər hansı konkret təchizatçı həmin satınalma predmeti üzərində xüsusi hüquqlara malik olduqda və satınalma predmetinin əvəzedicisi və alternativi olmadıqda;
49.1.2.1. tələbatın təcili olmasına gətirib çıxarmış halları qabaqcadan görmək qeyri-mümkün olarsa və ya bu hallar satınalan təşkilatın bilərəkdən gözləməsinin nəticəsi olmadıqda;
49.1.2.2. təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə.
Gördüyünüz kimi, bu halların heç biri əsas vermir ki, QHT-lərə Dövlət Dəstəyi Agentliyi belə bir saxtakarlıq etsin.
Lakin, nəzarət qurumu belə halları nəzərə almadan Agentliyə satınalma müqaviləsinin bağlanmasına icazə vermişdir. Müqaviləyə əsasən Agentlik “BRİGHT SOLUTİONS” MMC-yə 181 342 manat vəsait köçürmüşdür.
Maraq doğuran səbəblərdən də biri nəzarət qurumunun belə qanunsuzluğa qol qoyması və 2 tədbir üçün bu məbləğdə vəsaitin ayrılmasına razılıq verməsidir.
15 aprel 2025-ci ildə Milli Məclisin İqtisadi siyasət, sənaye və sahibkarlıq komitəsinin keçirilən iclasında “Azərbaycan Respublikası Hesablama Palatasının 2024-cü ildə fəaliyyəti haqqında hesabat”ının müzakirəsi zamanı Palatanın sədri Vüqar Gülməmmədov bir açıqlama vermişdi: “Bir mənbədən satınalmaların sayı və məbləğində artımın qeydə alınması şəraitində bu metod üzrə qiymətlərin optimallaşmasına zərurət var. Bir mənbədən satınalma metodunun vaxt məhdudiyyəti əsası ilə alınan icazələrinin Icra prosesində təsdiqinin tapmaması, bir mənbədən satınalma metodunun tətbiqinin vaxta qənaətə imkan verməsi fonunda əksər hallarda vəsaitə qənaətlə nəticələnməməsi kimi hallar müşahidə edilmişdir”.
Buradan Hesablama Palatasının sədri Vüqar müəllimə səslənirik. Sizin audit sahəsində kifayət qədər təcrübəniz var. Xahiş edirik, auditorlarınız QHT-lərə Dövlət Dəstəyi Agentliyinin fəaliyyətindəki bu saxtakarlıqları ciddi araşdırsınlar.
Təsadüfi deyil ki, QHT-lərə Dövlət Dəstəyi Agentliyi mütəmadi olaraq bütün tədbirləri üçün “bir mənbə” satınalma metodundan istifadə edir. Görünür buradakı maraq digər satınalmalardan daha güclüdür. Əksər qurumlar bu metoddan il ərzində heç bir dəfə də istifadə edə bilmir. Görünür, əlahəzrət güc Agentliyin satınalmalarına böyük maraq göstərib, dəstək verir.
Əvvəlki yazılarımızda təqdim etdiyimiz kimi QHT-lərə Dövlət DəstəyiAgentliyindəki tədbirlərin keçirilməsinin bir səbəbi var, o da dövlət büdcəsində xeyli miqdarda pul çırpışdırmaq. Tədbirlərin mövzusuna, onların nəticələrinə ayrıca toxunacağıq. Görüntü, daha çox pul silmək üçün hər cür yola əl atırlar, rəsmi tədbirə musiqiçilərə qədər gətirib oxudurlar ki, büdcə böyük olsun. Soruşan yoxdur ki, tədbirdə qaldırdığınız problem və ya məsələnin nəticəsi necə oldu? /yenixeber.org
